Toshkent IIBB ota-onalarni “Ryodan” harakatidan ogohlantirdi

Toshkent shahar Ichki ishlar bosh boshqarmasi ota-onalarga murojaat bilan chiqib, ularni “Ryodan” o‘smirlar harakatining xavfli oqibatlaridan ogohlantirdi. 

Ma’lum qilinishicha, O‘zbekistonda ham Yapon komikslaridan birining qahramonlaridan ilhomlangan “Ryodan” xalqaro yoshlar harakati muxlislari bor. 

Harakat haqida nimalarni bilish lozim va u qanday xavf tug‘dirishi mumkin?

Dastlab “Ryodan” harakati tashkil etilganda, internetdagi bir nechta virtual jamoalardan iborat bo‘lgan: ular yapon animatsiya san’ati muxlislari bo‘lib, o‘smirlarni qiziqishlari bo‘yicha birlashtirishdan boshqa maqsadlarni ko‘zlamagan edi. Bolalar o‘zlarining sevimli san’atlarini muhokama qilar va shunga o‘xshash kiyimlarni (orqasida o‘rgimchak rasmi hamda 4 raqami bo‘lgan katakli shim va futbolkalar) tanlashar edi.

Biroq, vaqt o‘tishi bilan harakatdan yangi yo‘nalish ajralib chiqib, ular ichida bir qator tajovuzkor shaxslar paydo bo‘ldi. Ular hududdagi vaziyatni beqarorlashtirish, o‘smirlarning to‘liq shakllanmagan dunyoqarashiga ta’sir o‘tkazish orqali ularni nazorat qilishni maqsad qilib oldilar. Buning oqibatida, tarmoqdagi begona shaxslarning buzg‘unchi shiorlari ta’siriga berilib ketgan bolalar jamoat joylarida to‘planib, ommaviy tartibbuzarliklarni uyushtira boshladilar.

Ayni paytda “Ryodan” harakati tomonidan uyushtirilgan bunday holatlar Rossiya Federatsiyasi, Ukraina, Belarus va bir qator boshqa davlatlarda qayd etilgan. Janjallar tomonlarning turli darajadagi tan jarohatlari olishiga, shaxslarning mulkiga zarar yetkazilishiga, ko‘plab ma’muriy va jinoiy ishlarning qo‘zg‘atilishiga olib keladi. Biz yurtimizda bunday oqibatlarni oldini olishimiz kerak.

“Hurmatli ota-onalar! Farzandlaringizga e’tiborli bo‘ling, ularning qiziqishlarini o‘rganing, ayniqsa submadaniy qiziqishlariga befarq bo‘lmang”, deyiladi poytaxti IIBB murojaatida.

Shuningdek, huquq-tartibot idorasining bildirishicha, bolalarning anime va mangaga bo‘lgan qiziqishini qoralab bo‘lmaydi. Lekin, bolalar bu qiziqishi tufayli noma’lum shaxslarning ta’siriga tushib qolmayotganiga, virtual dunyoni haqiqatdan ajrata olish qobiliyatini yo‘qotmaganiga ishonch hosil qilish kerak.  

“Farzandlaringizning hayotiga, ularda kechayogan o‘zgarishlarga befarq bo‘lmang: ular bilan do‘stona munosabatda bo‘lish orqali qiziqishlarini, ishtiyoqini muhokama qiling, shu yo‘l bilan ularning fikrini o‘rganasiz va ularda bo‘layotgan o‘zgarishlarni sezish imkoningiz oshadi”, deb murojaatida yakun yasagan IIBB.