Toshkent IESda mazut ishlatildi

Toshkent issiqlik elektr stansiyasida mazutdan foydalanilayotganligi aniqlandi. Bu haqda Ekologiya, atrof-muhitni muhofoza qilish va iqlim o‘zgarishi vazirligi matbuot xizmati xabar berdi. 

Joriy yilning 23-31 yanvar kunlari Ekologiya vazirligi tomonidan Toshkent viloyati, Qibray tumani, Salar shaharchasida joylashgan “Toshkent IES” (issiqlik elektr stansiyasi) faoliyati tekshirilgan.

Tekshiruv davomida korxonada gaz asosiy yoqilg‘i hisoblangani, shuningdek, qo‘shimcha yoqilg‘i sifatida mazutdan foydalanilayotganligi aniqlangan. Shu sababli Toshkent shahri havosini tutun qoplagan. 

Tekshiruv natijalariga ko‘ra issiqlik elektr stansiyasiga atrof-muhitni ifloslantirgani uchun 1 mlrd 23 mln so‘m (atrof-muhitni ifloslantirganlik uchun 759 mln. neft mahsulotlari bilan yerni ifloslantirganlik uchun 264 mln) miqdorida kompensatsiya belgilangan. 

Bundan tashqari, IESga aniqlangan kamchiliklarni bartaraf etish yuzasidan 16 banddan iborat majburiy ko‘rsatmalar berildi.

Ayni damda to‘plangan hujjatlar huquqbuzarlikka yo‘l qo‘ygan IES mansabdor shaxslariga tegishli chora ko‘rish maqsadida sud organlariga yuborilmoqda.