Telegram'da ham storis qo‘yish imkoniyati paydo bo‘ladi 

Telegram ijtimoiy tarmoq platformasida ham Instagram'da bo‘lgani kabi storis qo‘yish imkoniyati yaratiladi. Bu haqda messenjer asoschisi Pavel Durov o‘zining Telegram kanalida xabar berdi. 

Durovning yozishicha, yillar davomida unga kelgan murojaatlarning yarmidan ortig‘i aynan storis masalasida bo‘lgan. Durov boshida bunga qarshi chiqqan bo‘lsada, endilikda tez orada Telegram platformasida mazkur funksiya ishga tushishini ma’lum qilgan. 

Joriy qilinayotgan yangilanishga ko‘ra, foydalanuvchi Telegram profiliga joylaydigan storisini ko‘rishi mumkin bo‘lgan odamlar ro‘yxatini cheklashi, ya’ni faqat kontaktlar ro‘yxatida borlar, yaqin do‘stlar ro‘yxatidagilar yoki istisno tariqasida tanlangan akkauntlar egalari storisni ko‘ra oladigan tarzda sozlashi mumkin bo‘ladi. Shuningdek, foydalanuvchilar ko‘rishni xohlamagan har qanday storisni yashirish imkoniyatiga ham ega bo‘ladi. 

Storis topish qulay bo‘lishi uchun chatlar ro‘yxatining yuqori qismidagi bo‘sh maydonda joylashadi. 

Telegram'da ham Instagram'dagi kabi storis uchun tanlangan foto va videolarni tahrirlash maqsadida maxsus vositalardan foydalanish, ko‘proq kontekst yoki havolalar qo‘shish va boshqa odamlarni belgilash mumkin bo‘ladi. 

Orqa va old kamera yordamida olingan fotosurat va videolarni bir vaqtning o‘zida joylashtirish imkoniyati ham taqdim etiladi. 

Shuningdek, yana bir katta yangilik shuki, Instagram'dan farqli ravishda endilikda Telegram strorisining o‘chish muddatini ixtiyoriy tarzda tanlash mumkin bo‘ladi. Bunda foydalanuvchilar qo‘ygan storis ularning xohishiga qarab 6, 12, 24 va 48  soat davomida turishi mumkin. 

Bundan tashqari yana ko‘plab “syurpriz”lar bo‘lishi va’da qilinmoqda. 

Storis joylash imkoniyati Telegram kanallarida ham mavjud bo‘lishi, ular bu orqali foyda ko‘rishi, jumladan, storisni ulashish imkoniyati ham joriy qilinganidan keyin Telegram kanallari yanada kattaroq auditoriyaga yetib borishi ta’kidlangan. 

Yangi funksiya joriy yilning iyul oyi boshlarida ishga tushiriladi.