Tabiiy ofatlar oqibatida yetkazilgan zararni qoplash tartibiga o‘zgartirishlar kiritildi

Jamiyat 2398
image

Yuzaga kelgan tabiiy ofatlarning ko‘lamiga qarab (lokal, mahalliy, respublika va transchegaraviy) aholiga yetkazilgan zarar Qoraqalpog‘iston Respublikasi, viloyatlar va Toshkent shahri hamda shahar va tumanlar favqulodda vaziyatlarning oldini olish va ularni bartaraf etish bo‘yicha hududiy komissiyalarining taqdimnomalariga muvofiq qoplanadi.

Bu haqda 25 noyabr kuni qabul qilingan Vazirlar Mahkamasining “Tabiiy ofatlar oqibatida aholiga yetkazilgan zararni qoplash tartibi to‘g‘risidagi nizomni tasdiqlash haqida”gi qarorida so‘z boradi.

Bundan tashqari, qarorga ko‘ra, O‘zbekiston Respublikasining byudjet qonunchiligiga muvofiq zararni qoplash Vazirlar Mahkamasining, Qoraqalpog‘iston Respublikasi respublika byudjetining, viloyatlar viloyat byudjetlarining va Toshkent shahri shahar byudjetining, tumanlar va shaharlar byudjetlarining zaxira jamg‘armalari, jismoniy va yuridik shaxslarning homiylik xayriyalari yoki qonun hujjatlarida taqiqlanmagan boshqa manbalar hisobidan amalga oshiriladi.

Hujjat bilan tasdiqlangan Nizom tabiiy ofat yuzaga kelgan hududda o‘zboshimchalik bilan qurilgan hamda davlat ro‘yxatidan o‘tkazilmagan uy-joy, boshqa bino, inshoot yoki o‘zga ko‘chmas mulklar, shuningdek, qimmatbaho metallarga tatbiq etilmaydi.

Ta’kidlanishicha, sug‘urta ob’ekti hisoblangan badiiy qiymatga ega buyumlar hamda mol-mulkka tabiiy ofat natijasida yetkazilgan zarar fuqarolik qonunchiligiga muvofiq sug‘urtalovchi tashkilot hisobidan qoplanadi.

Shuningdek, Nizomda quyidagilar qayd etildi:

•  tabiiy ofatlar oqibatida etkazilgan zararni aniqlash va baholash ishlarini tashkil etish tartibi;

•  zararni aniqlash tartibi;

•  yetkazilgan zararni qoplash to‘g‘risidagi arizalarni qabul qilish tartibi;

•  tabiiy ofatlar oqibatida jabrlangan shaxslarga etkazilgan zararni qoplash tartibi;

•  tabiiy ofat oqibatida og‘ir tan jarohati olgan fuqarolarga hamda tabiiy ofat oqibatida halok bo‘lgan fuqarolarning oila a’zolariga bir martalik moddiy yordam to‘lash tartibi.

Hujjat bilan, Moliya vazirligi, FVV, Mahalla va oilani qo‘llab-quvvatlash vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga sug‘urtalovchi tashkilotlar bilan birgalikda aholining mol-mulk va yashash joylarini tabiiy ofatlardan sug‘urta qilish bo‘yicha targ‘ibot ishlarini amalga oshirish vazifasi topshirilgan.

FVV, Davlat geologiya va mineral resurslar qo‘mitasi, DSQ huzuridagi Kadastr agentligi, Qurilish vazirligi huzuridagi Qurilish sohasida nazorat inspeksiyasi, Gidrometeorologiya xizmati markaziga Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda joylarda tabiiy ofatlar yuzaga kelishi mumkin bo‘lgan hududlarda yashovchi aholi bilan profilaktika tadbirlarini muntazam o‘tkazib borish vazifasi topshirildi.
 
Ma’lum qilinishicha, hujjat Qonun hujjatlari ma’lumotlari milliy bazasida e’lon qilingan va 26 noyabrdan kuchga kirgan.

Sarvar Anvar o‘g‘li
Maqolaga baho bering
Baholaganlar: 14
Reyting: 2.9
t
×