Suriya elchixonalarida yangi bayroq osilmoqda

Suriyada Bashar Asad rejimi ag‘darilgandan so‘ng respublikaning chet davlatlaridagi diplomatik vakolatxonalarida davlat bayrog‘i o‘zgartirilmoqda.

Germaniya poytaxti Berlindagi Suriya elchixonasi binosidagi davlat bayrog‘i qizil o‘rniga yashil chiziqli yangisiga almashtirildi. Ayni paytda elchixona veb-saytida qizil chiziqli davlat bayrog‘i tasviridan foydalanilgan, “Prezident” bo‘limida esa Bashar Asadning surati joylashtirilganligicha qolmoqda.

Parijning 7-okrugidagi respublika elchixonasi binosidagi Suriya davlat bayrog‘i ham qizil o‘rniga yashil chiziqli yangisiga almashtirildi.

Elchixona veb-sayti bugun, 9 dekabr kuni ertalab qizil chiziqli davlat bayrog‘idan foydalangan va uning yonida respublikaning sobiq prezidenti Bashar Asadning surati chop etilgan edi. Taxminan soat 12:00 da uning portreti g‘oyib bo‘ldi va sahifaning yuqori qismida avvalgisidan ikki baravar kattaroq yangi bayroq tasviri paydo bo‘ldi.

Shuningdek, diplomatik missiya veb-saytida Suriya Tashqi ishlar vazirligi nomidan mamlakatda “tarixning yangi sahifasi yozilayotgani” aytilgan xabar chop etildi. Unda Respublika Tashqi ishlar vazirligi va uning diplomatik vakolatxonalari xorijdagi vatandoshlarni qo‘llab-quvvatlashda davom etishi ta’kidlangan.

Minskdagi elchixona binosidagi bayroq ustunidan Suriya davlat bayrog‘i olib tashlandi. Hozircha elchixona hududidagi bayroq ustuni bo‘sh. Suriyaning Minskdagi elchixonasi hududida vaziyat tinch.

Shu kuni Suriya elchixonasi Moskvadagi o‘z binosi ustiga muxolifat bayrog‘ini o‘rnatdi. Shuningdek, yangi bayroq allaqachon Suriyaning Ispaniya, Saudiya Arabistoni va Gretsiyadagi elchixonalari binolariga osib qo‘yilgan.

Ma’lumot uchun, Suriyaning oldingi davlat bayrog‘i uchta chiziqdan iborat – qizil, oq va qora – o‘rtada ikkita yulduz. Yangi bayroqda uchta gorizontal chiziq mavjud: yashil, oq va qora. O‘rtada – oq chiziqda uchta besh qirrali qizil yulduz bor. U dastlab 1932 yildan 1958 yilgacha Suriya Respublikasi va 1961 yildan 1963 yilgacha Suriya Arab Respublikasi tomonidan ishlatilgan. 2011 yildan buyon Suriya muxolifat kuchlari tomonidan foydalanilmoqda.