Sudlanganlar maktab direktori bo‘lolmasligi mumkin

Endilikda muqaddam sudlangan shaxslarning umumiy o‘rta ta’lim tizimida rahbarlik lavozimlarini egallashi taqiqlanishi mumkin. Bu haqda Xalq ta’limi vazirligi tomonidan ishlab chiqilgan qonun loyihasida keltirilgan.

Mazkur qonun loyihasi Normativ-huquqiy hujjatlar loyihalari muhokamasi portaliga joriy yilning 8 noyabr kuni joylashtirilgan bo‘lib, muhokama 23 noyabrgacha davom etadi.

Loyihaga ko‘ra, umumiy o‘rta ta’lim maktablarida muqaddam sudlanganlardan tashqari, quyida keltiriladiganlar ham rahbarlik lavozimiga tayinlanishiga cheklov qo‘yiladi:

•  sud tomonidan muomalaga layoqatsiz yoki muomala layoqati cheklangan deb topilgan shaxslar;

•  psixiatriya yoki narkalogiya muassasalarida hisobda turgan shaxslar;

•  umumiy o‘rta ta’lim tizimida rahbarlik faoliyatini amalga oshirishga to‘sqinlik qiladigan kasallikka chalingan shaxslar;

•  qasddan sodir etgan jinoyati uchun muqaddam sudlangan (sudlanganlik holati tugatilganligi, olib tashlanganligidan qat’i nazar) shaxslar;

•  jinoyat ishlari aybdorligi to‘g‘risidagi masala hal etilmagan holda tugatilgan jinoyatlarni (qasddan) sodir etgan shaxslar.

Eslatib o‘tamiz, Prezident farmoni bilan tasdiqlangan “2022-2026 yillarda xalq ta’limini rivojlantirish bo‘yicha Milliy dastur”ga ko‘ra, jinoiy javobgarlikka tortilgan shaxslarning xalq ta’limi tizimida rahbarlik lavozimiga tayinlanishini cheklash bo‘yicha normativ-huquqiy hujjatlarga o‘zgartirish kiritish belgilangandi.

Samandar Haqqiyev