Shveysariya Kanada ustidan qozonilgan g‘alaba bilan pley-offga chiqdi

Bugun, 25 iyun kuni Shveysariya terma jamoasi Jahon chempionati guruh bosqichining uchinchi turida Kanada ustidan 2:1 hisobida g‘alaba qozondi. Shu tariqa, Shveysariya “B” guruhi yetakchi sifatida pley-offga yo‘l oldi.

Vankuver shahrida bo‘lib o‘tgan uchrashuv natijasi har ikki jamoaning pley-off bosqichiga chiqishini ta’minladi.

Shveysariya safida Ruben Vargas 46-daqiqada, Joan Manzambi esa 57-daqiqada gol urdi. Kanadaliklar tomonidan Promis Devid 76-daqiqada javob to‘pini kiritdi.

O‘yinda kiritilgan gollarni ushbu havola orqali tomosha qilishingiz mumkin.

Shveysariya 7 ochko bilan “B” guruhida birinchi o‘rinni egalladi. Kanada 4 ochko jamg‘arib, ikkinchi pog‘onadan pley-offga yo‘l oldi. Bu Kanada terma jamoasi tarixida Jahon chempionati pley-off bosqichiga ilk bor chiqishi bo‘ldi.

1/16 finalda Shveysariya guruhda uchinchi o‘rinni egallab, pley-offga chiqqan jamoalardan biriga qarshi maydonga tushadi. Uchrashuv joriy yilning 3 iyul kuni Vankuverda o‘tkaziladi.

Kanada esa “A” guruhida ikkinchi o‘rinni egallagan jamoa bilan bahs olib boradi. Ularning 1/16 final doirasidagi uchrashuvi 28 iyun kuni AQSHning Inglvud shahrida bo‘lib o‘tadi. “A” guruhida ikkinchi o‘rin uchun Koreya Respublikasi, Chexiya va Janubiy Afrika terma jamoalari kurash olib bormoqda.