Швейцария Канада устидан қозонилган ғалаба билан плей-оффга чиқди

Бугун, 25 июнь куни Швейцария терма жамоаси Жаҳон чемпионати гуруҳ босқичининг учинчи турида Канада устидан 2:1 ҳисобида ғалаба қозонди. Шу тариқа, Швейцария “Б” гуруҳи етакчи сифатида плей-оффга йўл олди.

Ванкувер шаҳрида бўлиб ўтган учрашув натижаси ҳар икки жамоанинг плей-офф босқичига чиқишини таъминлади.

Швейцария сафида Рубен Варгас 46-дақиқада, Жоан Манзамби эса 57-дақиқада гол урди. Канадаликлар томонидан Промис Дэвид 76-дақиқада жавоб тўпини киритди.

Ўйинда киритилган голларни ушбу ҳавола орқали томоша қилишингиз мумкин.

Швейцария 7 очко билан “Б” гуруҳида биринчи ўринни эгаллади. Канада 4 очко жамғариб, иккинчи поғонадан плей-оффга йўл олди. Бу Канада терма жамоаси тарихида Жаҳон чемпионати плей-офф босқичига илк бор чиқиши бўлди.

1/16 финалда Швейцария гуруҳда учинчи ўринни эгаллаб, плей-оффга чиққан жамоалардан бирига қарши майдонга тушади. Учрашув жорий йилнинг 3 июль куни Ванкуверда ўтказилади.

Канада эса “А” гуруҳида иккинчи ўринни эгаллаган жамоа билан баҳс олиб боради. Уларнинг 1/16 финал доирасидаги учрашуви 28 июнь куни АҚШнинг Инглвуд шаҳрида бўлиб ўтади. “А” гуруҳида иккинчи ўрин учун Корея Республикаси, Чехия ва Жанубий Африка терма жамоалари кураш олиб бормоқда.