Shri-Lankada qiyin ahvolda qolgan o‘zbekistonlik ortga qaytarildi

Shri-Lankada huquqbuzarlik sodir etib, vaqtincha saqlash hibsxonasiga joylashtirilgan O‘zbekiston fuqarosi ortga qaytarildi. Bu haqda “Dunyo” xabar berdi.

Qayd etilishicha, fuqaro M.R. Shri-Lankaga turistik viza asosida borgan va kafelardan birida ishlayotgan vaqtida ushlangan. Shri-Lanka qonunchiligiga muvofiq, turistik viza asosida mehnat faoliyati bilan shug‘ullanish taqiqlangani bois, u vaqtincha saqlash hibsxonasiga joylashtirilgan.

Shundan so‘ng M.R. O‘zbekiston diplomatik vakolatxonasiga yordam so‘rab murojaat yo‘llagan. Elchixona rasmiylari mazkur murojaat yuzasidan Shri-Lanka Migratsiya boshqarmasi mutasaddilari bilan muloqot olib borgan.

Muzokaralar natijasida M.R. ning O‘zbekistonga qaytishi bo‘yicha kelishuvga erishilgan va “SriLankan Airlines” orqali “Kalumbiya – Kuala-Lumpur – Toshkent” yo‘nalishi bo‘yicha O‘zbekistonga qaytarilgan.

Eslatib o‘tamiz, avvalroq Turkiyaning Istanbul shahriga ish izlab borib, qiyin ijtimoiy vaziyatga tushib qolgan O‘zbekiston fuqarosi ortga qaytarilgandi.