Шри-Ланкада қийин аҳволда қолган ўзбекистонлик ортга қайтарилди

Шри-Ланкада ҳуқуқбузарлик содир этиб, вақтинча сақлаш ҳибсхонасига жойлаштирилган Ўзбекистон фуқароси ортга қайтарилди. Бу ҳақда “Дунё” хабар берди.

Қайд этилишича, фуқаро М.Р. Шри-Ланкага туристик виза асосида борган ва кафелардан бирида ишлаётган вақтида ушланган. Шри-Ланка қонунчилигига мувофиқ, туристик виза асосида меҳнат фаолияти билан шуғулланиш тақиқлангани боис, у вақтинча сақлаш ҳибсхонасига жойлаштирилган.

Шундан сўнг М.Р. Ўзбекистон дипломатик ваколатхонасига ёрдам сўраб мурожаат йўллаган. Элчихона расмийлари мазкур мурожаат юзасидан Шри-Ланка Миграция бошқармаси мутасаддилари билан мулоқот олиб борган.

Музокаралар натижасида М.Р. нинг Ўзбекистонга қайтиши бўйича келишувга эришилган ва “SriLankan Airlines” орқали “Калумбия – Куала-Лумпур – Тошкент” йўналиши бўйича Ўзбекистонга қайтарилган.

Эслатиб ўтамиз, аввалроқ Туркиянинг Истанбул шаҳрига иш излаб бориб, қийин ижтимоий вазиятга тушиб қолган Ўзбекистон фуқароси ортга қайтарилганди.