Shavkat Mirziyoyev 3 kunlik tashrif bilan Qozog‘istonga boradi

Joriy hafta o‘rtasida O‘zbekiston Prezidenti Shavkat Mirziyoyev Qozog‘istonga tashrif bilan boradi. Bu haqda Prezident Matbuot kotibi Sherzod Asadov brifingda ma’lum qildi.

Davlat rahbari 11 oktyabr kuni  Tatariston Prezidenti Rustam Minnixanov bilan uchrashadi.

12-14 oktyabr kunlari davlat rahbari Ostona shahrida Osiyoda hamkorlik va ishonch choralari bo‘yicha kengashining navbatdagi Sammitida, MDH Davlat rahbarlari kengashining navbatdagi majlisi hamda “Markaziy Osiyo – Rossiya” Sammitida ishtirok etadi.  

Shuningdek, Prezident xorijiy davlat va hukumat rahbarlari bilan uchrashuvlar o‘tkazadi. Jumladan, Vetnam Sotsialistik Respublikasi Vitse-prezidenti Vo Txi An Suan, Pokiston Islom Respublikasi Bosh vaziri Shahboz Sharif va bir qator xalqaro tashkilotlar rahbarlari bilan ikki tomonlama muzokaralar ham ko‘zda tutilgan.

Bundan tashqari, Prezident mamlakat iqtisodiy va ijtimoiy rivojiga bag‘ishlangan qator muhokamalar o‘tkazadi.

Oysha Turg‘unpo‘latova