Sharof Rashidovning o‘g‘li vafot etdi

Sharof Rashidovning o‘g‘li Ilhom Sharofovich Rashidov 72 yoshida vafot etdi. Bu haqda QALAMPIR.UZ manbasi xabar berdi.

Ilhom Rashidov otasi Sharof Rashidovning boshqaruvi davrida siyosiy jarayonlarda qatnashmagan, buni otasi xohlamagan. Lekin keyinchalik Ilhom Rashidov ma’lum muddat yuqori hukumat lavozimlarida ham xizmat qilgan.

Manbaga ko‘ra, u Toshkent shahrining O‘rda dahasida istiqomat qilgan. Hozirda marhumning janozasiga tayyorgarlik ishlari ketmoqda. Rashidov Toshkentdagi Chig‘atoy qabristoniga dafn qilinadi. Dafn marosimida O‘zbekiston hukumati vakillari ham qatnashishi kutilmoqda.

Xususan, sobiq tashqi ishlar vaziri, Prezidentning tashqi siyosat masalalari bo‘yicha maxsus vakili Abdulaziz Komilov ham dafn marosimida qatnashishi kutilmoqda. U Sharof Rashidovning kuyovi sanaladi. Komilov Rashidovning qizi Gulnora Rashidova bilan turmush qurgan.

Eslatib o‘tamiz, Sharof Rashidovning qizi, taniqli olima, jamoat arbobi Svetlana Sharofovna Rashidova 2021 yil 14 dekabr kuni 70 yoshida AQSHda vafot etgandi.