Sharmandali Olimpiada. Genetik diskriminatsiya qurboni bo‘layotgan boks

Sharmandali Olimpiada tobora o‘zining avj pallasiga kirmoqda. To‘rt yillikning eng yirik sport tadbiri Olimpiadaning ochilish marosimidagi sahna ko‘rinishlar, joiz bo‘lsa “badiiy chiqishlar” nafaqat islom davlatlari, balki qit’a ortida ham yetarlicha e’tirozlarga sabab bo‘ldi. Mayli ochilishga ko‘z yumib, sport bahslariga e’tiborni qarataylik desak, erkak bokschilarning ayollar bilan jang qilishiga nima deysiz?  

Bugun, Olimpiadadagi qovunlar cyeriyasi haqida so‘z ochishimiz aniq, lekin Parijdagi musobaqalar o‘ylaymizki, dunyo o‘zbeklari uchun Diyoraning olamshumul g‘alabasiyu, o‘zbek dzyudosi va boksining yirik natijalari yodda qoladi. Assalomu alaykum. QALAMPIR.UZ’da hafta sporti tahlili. 

Diyora Keldiyorova Olimpiadadagi kimonosini Lozanna muzeyiga sovg‘a qildi

Parij-2024 yozgi Olimpiya o‘yinlari chempioni, dzyudochi Diyora Keldiyorova musobaqada kurashgan kimonosini Xalqaro Olimpiya qo‘mitasining muzeyiga sovg‘a qildi. Bu haqda O‘zbekiston Olimpiya qo‘mitasi matbuot xizmati xabar berdi.

O‘yinlarning asosiy matbuot markazida ushbu tadbirga bag‘ishlangan anjuman o‘tkazildi. Tadbirda O‘zbekiston Respublikasi Sport vaziri Adham Ikramov, MOQ Bosh kotibi Oybek Qosimov, shuningdek, Xalqaro Olimpiya qo‘mitasi (XOQ) va Xalqaro dzyudo federatsiyasi mutasaddilari qatnashdi. 

Keldiyorova yozgi Olimpiya o‘yinlarida oltin medalga sazovor bo‘lgan ilk o‘zbek ayol sportchisiga aylandi. O‘z navbatida, Diyora ham tarixiy chempionlikka erishganidan mamnunligi, kimonosi XOQ muzeyidan joy olayotgani u uchun sharaf ekanini qo‘shimcha qildi.
Tadbir yakunida tashkilotchilar ham Keldiyorovaga o‘ziga xos sovg‘a tayyorladi. Diyoraning dzyudo olamidagi kumiri, ikki karra Olimpiada chempioni, fransiyalik Klariss Agbenenu Keldiyorova tarixiy g‘alaba bilan qutlab, unga o‘zining iliq tilaklarini yo‘lladi.

“Olg‘a, O‘zbekiston!” Britaniya elchisi Keldiyorovani g‘alaba bilan tabrikladi

Buyuk Britaniyaning O‘zbekistondagi Favqulodda va muxtor elchisi Timoti Smart Parij Olimpiadasida dzyudo bo‘yicha oltin medalni qo‘lga kiritgan Diyora Keldiyorovani g‘alaba bilan tabrikladi. Bu haqda u o‘zining  X (Twitter) sahifasida tvit qoldirgan.

“O‘zbekiston va Diyora Keldiyorovani g‘alaba bilan samimiy tabriklayman! Bu nafaqat yozgi Olimpiada o‘yinlarida o‘zbek sportchisi tomonidan qo‘lga kiritilgan birinchi Olimpiya oltini, balki O‘zbekistondagi barcha qizlarning xohlagan narsasiga erisha olishini ko‘rsatadigan medaldir! Olg‘a, O‘zbekiston!” deya yozgan u.

Parij-2024: Diktorlar ochilish marosimida Janubiy Koreyani KXDR bilan adashtirib yubordi 

Yozgi Olimpiadaning ochilish marosimida Janubiy Koreya terma jamoasi Shimoliy Koreya termasi deb e’lon qilindi. Bu haqda “Yonhap” xabar berdi.

Janubiy Koreya delegatsiyasi qirg‘oq bo‘ylab yurganida fransuz va ingliz tillarida so‘z yurituvchi diktorlar mamlakatni Koreya Xalq Demokratik Respublikasi deb e’lon qildi. 

Janubiy Koreya delegatsiyasi paradda 48-raqamda, KXDR jamoasi esa 153-bo‘lib chiqish qildi.

Janubiy Koreya sport vazirligi diktorlarning xatosi yuzasidan Xalqaro Olimpiya qo‘mitasi (XOQ) prezidenti Tomas Bax bilan uchrashishni talab qilmoqda hamda XOQ va mahalliy tashkiliy qo‘mitadan holat yuzasidan tushuntirish berishini istayapti. 
XOQ X’dagi sahifasida koreys tilidagi sahifasida bo‘lib o‘tgan holat yuzasidan uzr so‘radi.

“Ochilish marosimida Janubiy Koreya delegatsiyasi bilan bog‘liq xatolik uchun chuqur uzr so‘raymiz”, deyiladi xabarda.

XOQning uzri hali tashkilotning ingliz tilidagi sahifalarida chiqmadi.

Olimpiadada Janubiy Sudan o‘rniga adashib boshqa davlat madhiyasi qo‘yib yuborildi

2024 yilgi o‘yinlar tashkiliy qo‘mitasi basketbol o‘yini oldidan Janubiy Sudan davlatining madhiyasi o‘rniga boshqa davlat madhiyasi qo‘yib yuborilgani uchun uzr so‘radi. 

Parij Olimpiadasi tashkiliy qo‘mitasining aloqalar bo‘yicha direktori Enn Dekamps Puerto-Rikoga qarshi o‘yin oldidan Janubiy Sudan madhiyasini aralashtirib yuborgan tashkilotchilar xatosi uchun uzr so‘radi.

“Agar biz adashgan bo‘lsak, uzr so‘raymiz”, deydi Deskames.

28 iyul kuni Janubiy Sudan va Puerto-Riko o‘yini bo‘lib o‘tdi. Tashkilotchilar 2011 yilda mustaqil bo‘lgan Janubiy Sudan madhiyasi o‘rniga boshqa kuyni qo‘yib yubordi. Jamoa muxlislari xatodan norozilik bildirdi. 

Janubiy Sudan Puerto-Rikoni 90:79 hisobida mag‘lub etdi  va Olimpiadada o‘z tarixidagi ilk g‘alabasini qo‘lga kiritdi.

Parij Olimpiadasida ayol bokschi erkak bo‘lib chiqdi 

Fransiyada bo‘lib o‘tayotgan 2024 yilgi yozgi Olimpiada o‘yinlarining boks bo‘yicha ayollar o‘rtasidagi bahslarda italiyalik Anjela Karini raqibi, jazoirlik Iman Xelifga qarshi jangning 46-soniyasida to‘qnashuvni davom ettirishdan bosh tortdi. Bu haqda “Sky News” xabar berdi.

Nashrda keltirilishicha, Anjela Karini jang davomida raqibining kuchli zarbalariga dosh bera olmagan. Ilgari testosteron va jinsga oid testlardan o‘ta olmagani uchun jahon chempionatlarida qatnashishi taqiqlangan Jazoir bokschisi esa raqibi musobaqani tark etganidan so‘ng, Olimpiadadagi dastlabki jangida g‘alaba qozondi.

Italiya vakili jangdan so‘ng ringda tiz cho‘kkan va qaror e’lon qilinganida Iman Xelifning qo‘lini siqishdan bosh tortgan.
Xalif 2023 yilda Nyu-Dehlida bo‘lib o‘tgan jahon chempionatida oltin medal uchun kurashdan bir necha soat oldin Xalqaro boks assotsiatsiyasining (IBA) muvofiqlik mezonlarini bajara olmagani uchun diskvalifikatsiya qilingan edi. Jazoir Olimpiya qo‘mitasi (SOA) esa avvalroq Xelifga qilingan hujumlarni qoralagandi.

Shu bilan birga, ertaga, 2 avgust kuni 57 kilogramm vazn toifasida Xitoy Taypeyi (Tayvan) vakili Lin Yuy-Tin o‘zbekistonlik Sitora Turdibekovaga qarshi ringga ko‘tariladi. Ikki karra jahon chempioni Lin tashkilotchilar mezonlarini bajara olmagani uchun jahon chempionatidagi bronza medalidan mahrum bo‘lgandi. Lin ham, Xelif ham 2020 yilda Tokio o‘yinlarida hech qanday bahs-munozaralarsiz jang qilgan ikkita Olimpiadachi hisoblanadi.

“Ularning pasportlariga ayol deb yozilgan. Shu boisdan ularning jinsini muhokama qilish asossizdir”, degan Xalqaro olimpiya qo‘mitasi matbuot kotibi Mark Adams.