Sentyabr oyida o‘zbekistonliklarni qanday ob-havo kutyapti?

Joriy yilning sentyabr oyida ob-havoning nisbatan quruq va biroz iliq bo‘lishi kutilmoqda. Bu haqda O‘zgidromet e’lon qilgan ob-havo prognozi ma’lumotida keltirilgan.

Unga ko‘ra, oyning birinchi o‘n kunligida havo asosan kam bulutli bo‘lib, qulay harorat fonida quruq ob-havo kuzatilishi kutilmoqda.

Kechasi va erta tongda harorat 15–20 daraja bo‘lib, yoqimli salqinlik seziladi. Kunduz kunlari esa quyosh nurlari ta’sirida havo 30–35 darajagacha, ayrim kunlarda 37 darajagacha isishi mumkin.

Respublikaning janubiy hududlarida eng issiq kunlarda havo harorati 38–40 darajagacha ko‘tarilishi ehtimoli mavjud.

Oyning ikkinchi va uchinchi o‘n kunliklarida nisbatan barqaror harorat foni shakllanishi kutilmoqda. Bu davrda havo harorati kechalari asosan 10–15 daraja, kunduz kunlari esa 25–30 daraja bo‘lishi prognoz qilinmoqda.

Shu bilan birga, ayrim qisqa muddatlarda havo haroratining ham yuqorilash, ham pasayish tomonga o‘zgarib turishi ehtimoldan xoli emas.

Oyning ayrim kunlarida, ya’ni oy davomida 1–3 kun biroz jadallikdagi yomg‘irlar yog‘ishi mumkin. Respublikaning janubiy hududlarida sentyabr oyida yomg‘ir yog‘ish ehtimoli juda kam.

Respublika hududining katta qismida oylik yog‘ingarchilik miqdorining me’yordan kam bo‘lishi, Farg‘ona vodiysining ayrim joylarida me’yor atrofida kuzatilishi, Qoraqalpog‘iston Respublikasi va Xorazm viloyatida esa yog‘ingarchilik miqdorining me’yordan ko‘p yoki me’yor atrofida bo‘lishi kutilmoqda.

Eslatib o‘tamiz, avvalroq O‘zbekistonda ertaga, 28 avgust kuni havo asosan biroz bulutli bo‘lishi, yog‘ingarchilik kutilmasligi, ayrim hududlarda shamol kuchayib, chang-to‘zonlar kuzatilishi va harorat 32–40 darajagacha ko‘tarilishi kutilayotgani haqida xabar berilgan edi.