Rubio “qora shahzoda” bilan uchrasharkan, Isroil Trampning G‘azo bo‘yicha taklifini olqishladi 

Kecha, 17 fevral kuni AQSH Davlat kotibi Marko Rubio Saudiya Arabistonida muzokaralar olib borar ekan, Isroil AQSH Prezidenti Donald Trampning G‘azo aholisini ko‘chirish bo‘yicha taklifiga sodiqligini e’lon qildi. Isroil Mudofaa vaziri Isroil Kats G‘azo aholisining “ixtiyoriy ravishda chiqib ketishi” uchun maxsus agentlik tashkil etilishini aytdi.

“Mudofaa vaziri Isroil Katz bugun (17 fevral) g‘azoliklarning o‘z ixtiyori bilan chiqib ketishi bo‘yicha yig‘ilish o‘tkazdi va uning yakunida Mudofaa vazirligi tarkibida g‘azoliklarning o‘z ixtiyori bilan chiqib ketishi bo‘yicha idora tashkil etishga qaror qildi”, deyiladi vazirlik bayonotida.

Isroildagi muzokaralardan so‘ng Saudiyaga borgan Davlat kotibi Marko Rubio valiahd shahzoda Muhammad bin Salmon bilan Yaqin Sharqqa ilk tashrifi davomida uchrashdi.

Isroilning asosiy ittifoqchisi va qurol yetkazib beruvchisi bo‘lgan Qo‘shma Shtatlar arab hukumatlarining muqobil takliflariga ochiq ekanini aytadi, biroq Rubio hozircha “yagona reja Tramp rejasi”ekanini aytmoqda.

“Davlat kotibi mintaqaviy xavfsizlikka hissa qo‘shadigan G‘azo kelishuvining muhimligini ta’kidladi”, dedi Davlat departamenti matbuot kotibi Temmi Bryus Rubio va valiahd shahzoda uchrashuvi haqidagi bayonotida.

Trampning taklifida tafsilotlar keltirilmagan, biroq u falastinliklar G‘azoda “baxtsiz hayot kechirayotganini” va 15 oydan ortiq davom etgan urushdan so‘ng rekonstruksiya qilinadigan qirg‘oq hududi “Yaqin Sharqning Rivera”siga aylanishi mumkinligini aytgan.

Qo‘shma Shtatlar, shuningdek, Saudiya Arabistoni Isroilni tan oladigan tarixiy kelishuvga intilmoqda.

Buning evaziga Ar-Riyod Falastin davlatini yaratishni talab qilmoqda – bu Isroil rahbarlari uzoq vaqtdan beri qarshilik qilib kelgan va Trampning G‘azo bo‘yicha rejasiga zid kelishi mumkin.

Kecha, 17 fevral kuni Misrda “Ikki davlat yechimi uchun global alyans”ga a’zo davlatlar yig‘ilishi bo‘lib o‘tdi. Misr Tashqi ishlar vazirligi Qohira Isroil-Falastin mojarosida “ikki davlat qaroriga to‘liq sodiqligini” va “mustaqil Falastin davlatini barpo etish zarurligini” ta’kidladi.

Isroil Bosh vaziri Binyamin Netanyaxu esa kechagi bayonotida “AQSH Prezidenti Trampning yana bir G‘azo yaratish rejasiga sodiqligini” aytdi va urushdan keyin “na HAMAS, na Falastin ma’muriyati” hududni boshqarmasligiga va’da berdi.

Netanyaxu avvalroq Rubio bilan Trampning “G‘azo kelajagi bo‘yicha dadil qarashlari” va “bu qarash haqiqatga aylanishini ta’minlash” yo‘llari haqida gaplashganini aytgandi – ekspertlar bu xalqaro huquqni buzadi deb ogohlantirdi.

Saudiya Arabistoni manbasining AFP'ga xabar berishicha, Ar-Riyod shu hafta oxirida Prezident Donald Trampning G‘azo bo‘yicha keng tanqid qilingan rejasiga “arab muqobillarini muhokama qilish” uchun mintaqaviy sammit o‘tkazadi. 21 fevral kuni bo‘lishi kutilayotgan sammitda Misr, Iordaniya, Birlashgan Arab Amirliklari, Bahrayn, Saudiya Arabistoni, Ummon, Qatar va Quvayt vakillari ishtirok etadi.