Rossiyadan Qozog‘istonga samolyot olib o‘tmoqchi bo‘lgan shaxs ushlandi

An-2 samolyotini yuk mashinasida Qozog‘istonning Rossiya bilan chegarasidan ruxsatnomasiz olib o‘tmoqchi bo‘lgan shaxs to‘xtatib qolindi. Bu haqda TACC xabar berdi.

Ma’lum qilinishicha, Omongeldi avtoo‘tkazish punktida (Rossiya Federatsiyasining Omsk viloyati bilan chegaradosh) MAZ 54323 rusumli avtomashinani ko‘zdan kechirish chog‘ida og‘irligi 3 tonna bo‘lgan An-2 samolyotini olib o‘tishga urinish holati aniqlangan.

Samolyot egasi uni auksionda shaxsiy foydalanish uchun sotib olganini aytgan. Mulkdorga nisbatan Qozog‘iston Ma’muriy huquqbuzarliklar to‘g‘risidagi kodeksining 463-moddasi 1-qismi (Tadbirkorlik yoki boshqa faoliyat bilan shug‘ullanish, shuningdek, tegishli ro‘yxatdan o‘tmasdan, ruxsatnoma yoki bildirishnomasiz harakatlar qilish) bo‘yicha bayonnoma tuzilgan. Qozog‘istonning Pavlodar viloyati sudi ushbu shaxsni 55 ming tenge (taxminan 104 dollar) miqdorida jarimaga tortdi.

Ma’lumot uchun, An-2 samolyoti SSSRda ishlab chiqilgan. U “makkajo‘xori o‘simligi” sifatida tanilgan, chunki u makkajo‘xori dalalarini yetishtirish va qishloq xo‘jaligi maqsadlarida ishlatilgan. Biroq bazan samolyotdan harbiy maqsadlarda ham foydalanilgan.

Eslatib o‘tamiz, avvalroq O‘zbekiston va Qozog‘iston o‘rtasidagi “Malik” chegara o‘tkazish punktida yirik miqdordagi qimmatbaho zargarlik buyumlarini noqonuniy ravishda olib kirishga bo‘lgan urinish fosh qilingandi.