Rossiyada o‘zbekistonlik quruvchi yigit ish joyida o‘lik holda topildi

Rossiyaning Leningrad viloyatidagi qurilish maydonchasida o‘zbekistonlik ishchining jasadi topildi. Bu haqda “47 kanal” xabar berdi.

Qayd etilishicha, kecha, 2 fevral kuni Vsevolojsk tumani politsiyasiga Tyulpan ko‘chasidagi qurilish ob’ektida 23 yoshli O‘zbekiston fuqarosining jasadi topilgani haqida xabar berilgan. Yigit yangi qurilayotgan binoning 16-qavatida yotgan holda aniqlangan.

Ma’lumotlarga ko‘ra, marhum mazkur ob’ekt qurilishida oddiy ishchi sifatida ishlagan, biroq Leningrad viloyatida rasmiy ro‘yxatdan o‘tmagan.

Hozirda o‘lim sabablarini aniqlash uchun sud-tibbiy ekspertiza tayinlangan, tergovchilar hodisa yuzasidan tekshiruv olib bormoqda.

Eslatib o‘tamiz, avvalroq ham taxminan soat 23:30 da Rossiyaning Leningrad viloyatining Kingisepp tumanidagi Ust-Luga qishlog‘i yaqinida joylashgan Krakole kvartalida metall konstruksiyalarni yig‘uvchi bo‘lib ishlagan 42 yoshli O‘zbekiston fuqarosi taxminan 30 metr balandlikdan qulab tushib, vafot etgandi.