Россияда ўзбекистонлик қурувчи йигит иш жойида ўлик ҳолда топилди

Россиянинг Ленинград вилоятидаги қурилиш майдончасида ўзбекистонлик ишчининг жасади топилди. Бу ҳақда “47 канал” хабар берди.

Қайд этилишича, кеча, 2 февраль куни Всеволожск тумани полициясига Тюльпан кўчасидаги қурилиш объектида 23 ёшли Ўзбекистон фуқаросининг жасади топилгани ҳақида хабар берилган. Йигит янги қурилаётган бинонинг 16-қаватида ётган ҳолда аниқланган.

Маълумотларга кўра, марҳум мазкур объект қурилишида оддий ишчи сифатида ишлаган, бироқ Ленинград вилоятида расмий рўйхатдан ўтмаган.

Ҳозирда ўлим сабабларини аниқлаш учун суд-тиббий экспертиза тайинланган, терговчилар ҳодиса юзасидан текширув олиб бормоқда.

Эслатиб ўтамиз, аввалроқ ҳам тахминан соат 23:30 да Россиянинг Ленинград вилоятининг Кингисепп туманидаги Усть-Луга қишлоғи яқинида жойлашган Краколье кварталида металл конструкцияларни йиғувчи бўлиб ишлаган 42 ёшли Ўзбекистон фуқароси тахминан 30 метр баландликдан қулаб тушиб, вафот этганди.