Rossiyada qarovsiz qolgan 21 bola O‘zbekistonga qaytarildi

Joriy yilning 29 mart kuni Rossiyada ota-ona qaramog‘idan mahrum bo‘lgan 21 nafar bola O‘zbekistonga qaytarildi. Bu haqda Ichki ishlar vazirligi xabar berdi.

Ma’lum qilinishicha, Vazirlar Mahkamasining 2020 yil 7 yanvardagi 6-son “Xorijda ota-ona qaramog‘idan mahrum bo‘lgan O‘zbekiston Respublikasi fuqarolarining bolalarini O‘zbekiston Respublikasiga qaytarish tartibini takomillashtirish to‘g‘risida”gi qaroriga muvofiq Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati hamda Sog‘liqni saqlash vazirligi mutaxassislaridan iborat ishchi guruhlar tuzilgan.

Qayd etilishicha, ular 21 nafar bolani qaytarish chog‘ida Rossiyadagi hamda Qozog‘istondagi O‘zbekiston elchixonalari bilan hamkorlikda faoliyat yuritgan.

Olib kelingan bolalarning barchasiga tibbiy, psixologik va ijtimoiy yordamlar ko‘rsatilib, 18 nafari Toshkent shahar IIBB HPB Voyaga yetmaganlarga ijtimoiy-huquqiy yordam ko‘rsatish markaziga, 3 nafari Toshkent shahar bolalar uyi davlat korxonasiga topshirilgan.

Ma’lumot uchun, o‘tgan uch oyda xorijdan O‘zbekistonga qaytarilgan bolalar soni 52 nafarni tashkil qilgan. Bu o‘tgan yilning shu davriga nisbatan 2,5 barobar ko‘p.

Eslatib o‘tamiz, avvalroq ham Rossiyada ota-ona qaramog‘isiz qolgan 11 nafar voyaga yetmagan o‘zbekistonlik bola mamlakatga qaytarilgandi.