Rossiya “Vagner”ga bergan qurollarini qaytarib oldi
Olam
−
12 iyul 2023
15382Rossiya Federatsiyasi Qurolli Kuchlari “Vagner” guruhidan qurol va harbiy texnikani qabul qilishni yakunladi. Bu haqda Rossiya Mudofaa vazirligi bayonot berdi.
Aytilishicha, Qurolli Kuchlar “Vagner”dan 2 mingdan ortiq texnika va qurollar, shu jumladan yuzlab tanklar, "Grad", "Uragan" raketa tizimlari, "Pansir" havo mudofaa tizimi, o‘ziyurar artilleriya moslamalari, zirhli transport vositalari va boshqalarni qaytarib olgan.
Vazirlik bayonotiga ko‘ra, “Vagner”dan olingan uskunalar orasida o‘nlab birliklar hech qachon jangovar sharoitlarda ishlatilmagan. Shuningdek, ikki yarim ming tonnadan ortiq turli xil o‘q-dorilar va 20 mingga yaqin kichik qurollar Rossiya Qurolli kuchlari ixtiyoriga o‘tkazilgan.
Bildirilishicha, barcha texnika va qurollar Rossiya Federatsiyasi Qurolli kuchlarining ta’mirlash-tiklash bo‘linmalari texnik xizmat ko‘rsatish va foydalanishga tayyorlashni amalga oshiradigan orqa hududlarga yetkaziladi.
Eslatib o‘tamiz, joriy yilning 24 iyun kuni “Vagner” guruhining rahbari Yevgeniy Prigojin harbiy isyon ko‘tarib, Moskvaga yo‘l olgandi. Shu kuni Belarus fuqarosi Aleksandr Lukashenko Putinning roziligiga ko‘ra, Prigojin bilan muzokaraga kirishgani va uni Moskvaga bormaslikka ko‘ndirganini e’lon qildi. Keyinchalik Rossiya Prezidentining matbuot kotibi Dmitriy Peskov Prigojinga qo‘yilgan barcha ayblovlar olib tashlanganini va u Belarusga ketishini ma’lum qildi. Prezident Putin esa “Vagner” jangchilariga Mudofaa vazirligi bilan shartnoma tuzish yoki Belarusga ketishni taklif qildi.
LiveBarchasi