Rossiya Ukrainaga raketa hujumi uyushtirdi

Bugun, 8 yanvar kuni ertalab Rossiya qo‘shinlari Ukraina hududiga raketa hujumi uyushtirdi. Bu haqda Ukraina Harbiy havo kuchlari xabar berdi.

Mahalliy vaqt bilan taxminan soat 6 da Ukrainada havo hujumi haqida ogohlantirish eshitilgan. Ma’lumotlarga ko‘ra, Rossiya samolyotlari Ukrainadagi nishonlarga bir yoki bir nechta tezyurar aeroballistik “Kinjal” raketalarini uchirgan.

Xarkov viloyati ma’muriyati rahbari Oleg Sinegubov erta tongda viloyatga kamida to‘rtta zarba berilganini aytgan. Dastlabki ma’lumotlarga ko‘ra, qurbonlar yo‘q.

Mahalliy ommaviy axborot vositalarining yozishicha, Zaporoje va Xarkov viloyatidagi turarjoy binolarida portlashlar bo‘lgan. Zaporojeda elektr energiyasi qisman yo‘qolgan.

Shuningdek, Dnepr va Krivoy Rogda ham portlashlar qayd etilgan.

Eslatib o‘tamiz, kecha, 7 yanvar kuni, Rossiya Mudofaa vazirligi  Ukraina harbiy-havo kuchlarining ikkita samolyoti Dnepropetrovsk viloyatida urib tushirilganini ma’lum qilgandi.