Rossiya qo‘shinlari Xersondan chekina boshladi

Rossiya armiyasi Dnepr daryosining chap qirg‘og‘idagi tayyorlangan pozitsiyalarga ko‘chishni boshladi. Bu haqda bugun, 10 noyabr kuni Rossiya Mudofaa vazirligi ma’lum qildi.

“Nikolayev-Krivoy Rog yo‘nalishida Rossiya qo‘shinlari guruhi bo‘linmalari Dnepr daryosining chap qirg‘og‘idagi tayyorlangan pozitsiyalarga qat’iy ravishda tasdiqlangan rejaga muvofiq manevr qilmoqda”, deyiladi vazirlik xabarida.

Rossiya Federatsiyasi Mudofaa vaziri Sergey Shoygu kecha qo‘shinlarni Dnepr orqali olib chiqishni boshlashni buyurdi. U tegishli vazifani maxsus harbiy operatsiya hududidagi Rossiya kuchlarining qo‘shma guruhi qo‘mondoni Sergey Surovikinga topshirdi, u avvalroq ushbu zonadagi vaziyat to‘g‘risida mudofaa idorasi boshlig‘iga hisobot bergan edi. Surovikin, o‘z navbatida, harbiy operatsiya zonasida harakat qilishning eng maqbul varianti mudofaani Dnepr to‘siq chizig‘i bo‘ylab tashkil qilish ekanini aytgan.

O‘z navbatida, Ukraina Qurolli Kuchlari bosh qo‘mondoni Valeriy Zalujniy Ukraina armiyasi bir sutka ichida Xerson yaqinidagi 12 ta aholi punktini nazoratga olganini ma’lum qildi.

Qayd etish kerakki, rus qo‘shinlarining Dneprning chap qirg‘og‘iga ko‘chirilishi Xerson shahrining tashlab chiqilishini anglatadi.