Rossiya dronlari Ukrainadagi portga hujum qildi

Rossiya dronlari Ukraina janubidagi port infratuzilmasiga zarar yetkazdi. Bu haqda bugun, 13 fevral kuni Ukraina rasmiylari xabar berdi.

Ayni paytda qo‘shni Moldova o‘z hududida ikkita dron portlaganini ma’lum qilgan bo‘lsa, NATO a’zosi Ruminiya havo hududi buzilgan bo‘lishi mumkinligini bildirdi.

Kiyevning xabar berishicha, Moskva kecha, 12 fevral kuni tunda 140 ta dron bilan Ukrainaga hujum qilgan. Odessa viloyatining Ruminiya va Moldova bilan chegaradosh Izmoil tumanidagi zarba oqibatida bir kishi jarohat olgan.

Favqulodda xizmatlar tarqatgan suratlarda qutqaruvchilar hujum joyida yong‘inni o‘chirgani aks etgan, biroq zarbaning aniq joyi aytilmagan. Rasmiylar ko‘pincha xavfsizlik nuqtai nazaridan bunday ma’lumotlarni oshkor qilmaydi.

Odessa viloyati Ukrainaning Qora dengiz orqali eksporti uchun asosiy markaz hisoblanadi va uning port infratuzilmasi 2022 yil fevral oyida Moskva boshlagan urushdan beri muntazam ravishda Rossiya zarbalariga uchragan.

Moldova Prezidenti Mayya Sandu Rossiyaning ikki droni mamlakat havo hududini buzib, uning hududida portlagani “moldovaliklar hayotini xavf ostiga qo‘ygani”ni aytdi.

“Rossiya chegaralarni hurmat qilmaydi, tinch aholiga hujum qiladi, qo‘rquv sepadi... Bizni tinch qo‘ying”, deb yozdi u X ijtimoiy tarmog‘ida.

Moldova Tashqi ishlar vaziri Mixail Popshoy vazirlik voqealar yuzasidan Rossiya elchisini chaqirishini aytdi.

Ruminiya Mudofaa vazirligi ikki dron mamlakat havo hududini buzgan bo‘lishi mumkinligini bildirdi.

Ukraina harbiylarining xabar berishicha, 140 ta drondan 85 tasini urib tushirishga muvaffaq bo‘lgan, yana 52 tasi esa elektron uskunalar tufayli o‘z maqsadlariga yeta olmagan.

Rossiya esa Ukrainadagi tinch aholi nishonlari yoki tinch aholini ataylab nishonga olganini bir necha bor rad etib keladi.