Rossiya Bosh prokurori “Tolibon”ning mamlakatda faoliyat yuritishiga ruxsat so‘radi 

Rossiya Bosh prokuraturasi 2021 yilda Afg‘onistonda hokimiyat tepasiga kelgan “Tolibon” harakati faoliyatini taqiqlashni to‘xtatib turish iltimosi bilan Rossiya Federatsiyasi Oliy sudiga murojaat qildi. Bu haqda “Interfaks” xabar berdi.

Rossiya Federatsiyasi Bosh prokurorining ma’muriy arizasi 17 aprel kuni Oliy sud tomonidan ko‘rib chiqiladi. Majlis yopiq eshiklar ortida o‘tadi.

2024 yil dekabrida Rossiya Davlat dumasi tashkilotlarni terrorchi tashkilotlar ro‘yxatidan chiqarishga ruxsat beruvchi qonunni qabul qildi. Keyin uni Vladimir Putin imzoladi.

Hujjatga ko‘ra, Rossiyada terrorchi deb e’lon qilingan tashkilot faoliyatiga qo‘yilgan taqiqni Bosh prokuror yoki uning o‘rinbosarining da’vosiga ko‘ra sud qarori bilan bekor qilish taklif etiladi.

Sud qaror qabul qilishi uchun “tashkilot ro‘yxatga kiritilganidan keyin terrorizmni targ‘ib qilish, oqlash va qo‘llab-quvvatlashga qaratilgan faoliyatini to‘xtatgani to‘g‘risida faktik ma’lumotlar” bo‘lishi kerak.

Rossiya rasmiylari so‘nggi yillarda “Tolibon”ni terrorchilik tashkilotlari ro‘yxatidan chiqarish rejalari haqida bir necha bor gapirgan.

Xususan, 2021 yil oktyabr oyida — AQSH Afg‘onistonni allaqachon tark etib, “Tolibon” mamlakatda hokimiyatni qo‘lga kiritganidan so‘ng — Rossiya Prezidenti Vladimir Putin Rossiya “Tolibon”ni terrorchi tashkilotlar ro‘yxatidan chiqarish qaroriga yaqinlashayotganini, biroq buni birinchi navbatda BMT Xavfsizlik Kengashi qilishi kerakligini aytdi.

Rossiya Tashqi ishlar vazirligi ham “Tolibon”ni terrorchilik tashkilotlari ro‘yxatidan chiqarish masalasi ishlab chiqilayotganini ma’lum qildi.