Rossiya BMT qarorgohini Nyu-Yorkdan ko‘chirishni taklif qildi

Rossiya Tashqi Ishlar vazirligi xalqaro tashkilotlar departamenti direktori Pyotr Ilichev BMT shtab-kvartirasini Nyu-Yorkdan neytralroq nuqtaga, masalan, Jeneva yoki Venaga ko‘chirishni taklif qildi. Shuningdek, u AQSHni tashkilot shtab-kvartirasi joylashgan davlat maqomi to‘g‘risidagi kelishuvga rioya qilmayotganlikda ayblagan. 

Gap shundaki, aprel oyida Birlashgan Millatlar Tashkiloti Xavfsizlik kengashiga raislik qilayotgan Rossiyaning Tashqi ishlar vaziri Sergey Lavrov 24-25 aprel kunlari Nyu-Yorkka bordi. Ammo AQSH Lavrovga Nyu-York safarida hamrohlik qiladigan rossiyalik jurnalistlarga viza bermadi. O‘ziga ham uzoq vaqt viza ololmagan Lavrov Rossiya buni unutmasligini aytdi.

BMT Bosh kotibi Antoniu Guterrishning matbuot kotibi Stefan Dyujarrik tashkilot shtab-kvartirasining joylashuvi to‘g‘risida qaror qabul qilish Bosh kotib vakolatiga kirmasligi, buni BMTga a’zo davlatlar hal qilishi kerakligini aytdi. 

“BMT shtab-kvartirasining qayerda joylashishi yoki yig‘ilishlar qayerda o‘tkazilishi masalasi Bosh kotibning emas, balki a’zo davlatlarning qarori”, deydi Guterrishning matbuot kotibi.