Rossiya Baxmutda fosfor bombalaridan foydalangani aytilmoqda (video)

Ukraina Rossiyani qamaldagi Baxmut shahriga fosforli o‘q-dorilar bilan hujum qilganlikda aybladi. Bu haqda BBC xabar berdi.

Ukraina harbiylari tomonidan e’lon qilingan video tasvirlarda Baxmut shahrining oq fosfor ichida yonayotganini ko‘rish mumkin. Aslida oq fosforli qurollar taqiqlanmagan, ammo ulardan fuqarolik hududlarida foydalanish urush jinoyati hisoblanadi. Ular o‘chirish juda qiyin bo‘lgan tez tarqaladigan yong‘inlarni vujudga keltiradi. Rossiya bundan avval ham ulardan foydalanganlikda ayblangan.

Ukraina Mudofaa vazirligining Twitter'da yozishicha, fosforli hujumda Baxmutning ishg‘ol qilinmagan hududlari yondiruvchi o‘q-dorilar bilan nishonga olingan. Kiyev maxsus kuchlari qo‘mondonligining qo‘shimcha qilishicha, Moskva kuchlari shaharni vayron qilishda davom etmoqda.

Hujum aynan qachon sodir etilgani noma’lum. Ammo Ukraina tomonidan tarqatilgan tasvirlar (kuzatuv droni tomonidan tasvirga olinganga o‘xshaydi) ko‘p qavatli binolar alanga ichida qolganini ko‘rsatadi.

Ijtimoiy tarmoqlarga joylangan boshqa videolarda yerda olov alangasi va tungi osmonni yoritayotgan fosforli oq bulutlar aks etgan. 

Rossiya o‘tgan yili Ukrainaga keng ko‘lamli bostirib kirishni boshlaganidan beri, jumladan, urush boshida Mariupol qamalida ham bir necha bor oq fosfordan foydalanganlikda ayblangan.

Moskva esa hech qachon oq fosfor ishlatganini oshkora tan olmagan va o‘tgan yili Kreml matbuot kotibi Dmitriy Peskov Ukraina rahbari Vladimir Zelenskiy undan foydalanilganini aytganidan keyin Rossiya hech qachon xalqaro konvensiyalarni buzmaganini ta’kidlagan.

Ma’lumot uchun, oq fosfor mumga o‘xshash modda bo‘lib, kislorod bilan aloqa qilganda yonib, yorqin tutun hosil qiladi. U 800 daraja haroratda yonadi va inson tanasining haddan tashqari kuyishiga olib kelishi mumkin. Bundan tashqari, u juda yopishqoq va olib tashlanishi qiyin.