Rossiya hududida jang boshlandi. Qurolli bo‘linmalar chegarani buzib o‘tdi 

Bugun, 12 mart kuni “Rossiya Ozodligi” legioni, “Rossiya ko‘ngillilar korpusi” (RKK) va “Sibir bataloni” Rossiya Federatsiyasi chegarasini buzib o‘tdi. Ular Belgorod viloyati hududiga kirdi, Kursk viloyatida ham otishma tovushlari eshitildi. Bu haqda harbiy muxbirlar va mahalliy Telegram-kanallar yozmoqda.

Aytilishicha, bir necha qurolli guruhlar Belgorod viloyatiga minomyot va artilleriya o‘qlari ko‘magida pikap mashinalarida chegarani yorib o‘tishga uringan. Bundan tashqari, hujumga urinish paytida bir nechta Ukraina tanklari Rossiya chegarasiga yaqinlashgani da’vo qilinmoqda.

Belgorod viloyatining chegara hududlarida jang davom etmoqda. “RBK-Ukraina”ning maxsus xizmatlardagi manbalariga ko‘ra, RKK Belgorod viloyati hududiga kirib kelgan. Telegram-kanallarning ta’kidlashicha, Belgorod viloyatidagi Lozovaya Rudka chegarasi RKK nazoratiga o‘tgan.

Shu bilan birga, Kursk viloyati aholisi Tetkino qishlog‘i hududida otishma sodir bo‘lganligi haqida xabar bermoqda. Ayni paytda ijtimoiy tarmoqlarda shahar yaqinida tasvirga olingani aytilayotgan pulemyotdan otish ovozlari aks etgan video tarqalmoqda. Unda aytilishicha, hududda otishma davom etmoqda, ikki kishi yaralangan, ular orasida oddiy fuqaro ham bor.

Shuningdek, "Rossiya Ozodligi" legioni internetda Rossiya Federatsiyasi hududida bronetransportyorning yo‘q qilingani aks etgan videoni e’lon qildi. Jangchilar keyinroq aniqlik kiritishicha, hodisa Tetkino qishlog‘ida sodir bo‘lgan.

Keyinchalik, Kursk viloyati gubernatori Roman Starovoyt rasmiy xabar bilan chiqdi. Uning so‘zlariga ko‘ra, Ukraina tomonidan “Glushkovskiy tumani Tetkino posyolkasida o‘qqa tutilmoqda”.

“Afsuski, u yerda jabrlangan shaxs bor. Mahalliy aholi vakili yengil tan jarohati oldi, unga zarur yordam ko‘rsatildi”, deydi Starovoit.

Shu bilan birga, u rossiyaliklar uchun bu kecha notinch bo‘lib tuyulganini esladi. Chunki birgina Kursk viloyatida 11 ta uchuvchisiz samolyot urib tushirilgan, ammo mintaqadagi raketa xavfi haligacha bartaraf etilmagan. 

Shu bilan birga, RKK jangchilari Ukraina-Rossiya chegarasidan olingan videoni ham chop etdi.

"Xo‘sh, do‘stlar, RKK yana hujumda birinchi o‘rinda. Kreml rejimi armiyasi jangni boshlamasdan ham qurollarini uloqtirmoqda”, deyiladi video ostida qoldirilgan izohda.

Shu bilan birga, Bryanskda "profilaktika choralari" e’lon qilindi. Viloyat gubernatori Aleksandr Bogomazning aytishicha, Bryansk hududida “terrorchilik harakatlarining oldini olish bo‘yicha profilaktika choralari ko‘rilmoqda”. U tafsilotlarni keltirmadi. Biroq mahalliy aholi ijtimoiy tarmoqlarda shaharning bir qancha ko‘chalari to‘sib qo‘yilgani haqida yozmoqda.

Ukraina razvedkasiga ko‘ra, RKK, “Rossiya ozodligi” legioni va “Sibir bataloni” mustaqil bo‘linmalar sifatida ishlaydi, chunki ular Rossiya Federatsiyasi fuqarolaridan iborat.

“Axir ular va nihoyat o‘z uyida. Bu bo‘linmalarning qo‘shma operatsiyasi hozir Rossiya Federatsiyasi deb ataladigan hududda amalga oshirilayotgandir, ehtimol”, deydi Ukraina razvedka boshqarmasi vakili Andrey Yusov 24-kanalga bergan izohida.

Rossiya Mudofaa vazirligi esa voqealar yuzasidan bildirgan munosabatida Kursk va Belgorodga kirgan “Rossiya Ozodligi” legioni, “Rossiya ko‘ngillilar korpusi” va “Sibir bataloni”ni jangchilarini “ukrainalik terrorchilar” deb ta’rifladi. Vazirlikka ko‘ra, yuqoridagi bo‘linmalar katta talafot ko‘rgan va ortga chekingan. 

“Ukraina tomonidagi chegara hududida Odnorobovka hududida 60 nafargacha ukrainalik terrorchi yo‘q qilindi, Nexoteyevka hududida uchta tank va bir bronetransportyor, Spodaryushino hududida esa ikkita tank yo‘q qilindi. Bundan tashqari, soat 8:00 dan 8:25 gacha Kursk viloyatining Tetkino qishlog‘i yaqinida chegara hududiga buzib kirishga uringan Ukraina qo‘poruvchilik-razvedka guruhining to‘rtta hujumi qaytarildi. Katta yo‘qotishlarga uchragan dushman orqaga qaytarildi”, deyiladi vazirlik bayonotida.

Eslatib o‘tamiz, oldinroq AQSHning Rossiyadagi elchixonasi Moskvadagi ehtimoliy teraktlardan ogohlantirgandi. Bunga Buyuk Britaniya, Latviya, Janubiy Koreya, Shvetsiya, Kanada, Germaniya va Chexiya davlatlari ham qo‘shilgandi.