Ronaldu Italiya chempionatining eng yaxshi futbolchilari o‘nligiga kira olmadi

Italiyalik mashhur darvozabon Janluijji Buffon Italiya A Seriyasining XXI asrdagi eng yaxshi futbolchisi, deb topildi. Bu haqda “Goal” xabar berdi.

Kuchli uchlikka afsonaviy italiyalik yarim himoyachi Andrea Pirlo va Franchesko Totti kirdi. “Milan”, “Inter” va “Yuventus”ning sobiq futbolchisi hisoblanmish Pirlo A Seriyada 493 ta o‘yin o‘tkazib, 58 ta gol urgan, 101 ta golga assistentlik qilgan va 6 ta chempionlik unvoniga ega.

Rim “imperatori” , “Roma” afsonasi Franchesko Totti esa faoliyati davomida faqat bitta Skudettoni qo‘lga kiritgan, ammo Italiya chempionatida 618 ta o‘yinda 250 ta gol urgan va 160 ta golli uzatmani amalga oshirgan.

Chempionatning asrdagi eng yaxshi futbolchisi bo‘lgan Buffon Italiya chempionatida 657 ta o‘yin o‘tkazib, 10 marta ona yurti chempioni bo‘lgan.

Reytingdan ukrainalik hujumchi Andrey Shevchenko ham joy oldi. U ro‘yxatda 9-o‘rinni egalladi va hatto 12-o‘rinni egallagan portugaliyalik Krishtianu Ronalduni ham ortda qoldirdi.

Ma’lumot uchun, Krishtianu Ronaldu 2018-2021 yillarda Turinning “Yuventus” klubida to‘p tepib, 98 ta uchrashuvda 81 ta gol urishga muvaffaq bo‘lgan. 

A Seriyaning XXI asrdagi eng yaxshi futbolchilari:

1. Janluijji Buffon (Italiya);
2. Franchesko Totti (Italiya);
3. Andrea Pirlo (Italiya);
4. Paulo Maldini (Italiya);
5. Zlatan Ibragimovich (Shvetsiya);
6. Xaver Zanetti (Argentina);
7. Jorjo Kellini (Italiya);
8. Kaka (Braziliya);
9. Andrey Shevchenko (Ukraina);
10. Alessandro Nesta (Italiya);
11. Andrea Barzali (Italiya);
12. Krishtianu Ronaldu (Portugaliya);
13. Lilian Tyuram (Fransiya);
14. Fabio Kannavaro (Italiya);
15. Alessandro Del Pero (Italiya);
16. Nikolo Barella (Italiya);
17. David Trezege (Fransiya);
18. Pavel Nedved (Chexiya);
19. Leonardo Bonuchchi (Italiya);
20. Klarens Zeyedorf (Niderlandiya);
21. Chiro Immobile (Italiya);
22. Gonsalo Iguain (Argentina);
23. Antonio Di Natale (Italiya);
24. Paulo Dibala (Argentina);
25. Tiago Silva (Braziliya).