Ronaldu dunyoning eng ko‘p maosh oluvchi sportchisi bo‘ldi

Portugaliyalik futbolchi Krishtianu Ronaldu dunyoning eng ko‘p maosh oluvchi sportchilari reytingida 1-o‘rinni egalladi. Bu haqda “Forbes” jurnali o‘zining yangilangan eng boy sportchilar reytingida ma’lum qildi.

Saudiya Arabistonining “Al-Nasr” klubi hujumchisi bir yilda 260 million dollar ishlab topdi, shundan 200 millioni uning klubdagi maoshi, 60 millioni esa reklama shartnomalaridan kelib chiqqan.

Qayd etilishicha, bu ko‘rsatkich futbolchilar uchun rekorddir. Ronaldu faoliyati davomida to‘rtinchi marta ushbu reytingda birinchi o‘rinni egalladi.

Eng ko‘p maosh oluvchi sportchilar ro‘yxatida 2-o‘rinni ispaniyalik golfchi Jon Ram egalladi, uning daromadi 218 million dollarni tashkil etdi, 3-o‘rinni 135 million dollar ishlab topgan Amerikaning “Inter Mayami” klubining argentinalik futbolchisi Lionel Messi egalladi.

Kuchli o‘ntalikka “Los-Anjeles Leykers” basketbolchisi Lebron Jeyms (128,2 million dollar), “Miluoki” basketbolchisi Jannis Antetokunmpo (111 million dollar), PSJ futbolchisi Kilian Mbappe (110 million dollar), “Al-Hilol” futbolchisi Neymar (108 million dollar) kirdi. “Al-Ittihod” futbolchisi Karim Beznzema (106 million dollar), “Golden Steyt” basketbolchisi Stiven Karri (102 million dollar) va “Baltimor”da o‘ynayotgan amerikalik futbolchi Lamar Jekson (100,5 million dollar) kuchli o‘nlikka yakun yasab berdi.

E’tiborlisi, reytingning kuchli o‘nligiga kirgan barcha sportchilar birinchi marta 100 million dollardan ortiq daromad qildi.