Ronaldu “Al-Nasr” murabbiyidan norozi bo‘lmoqda

Saudiya Arabistonining “Al-Nasr” klubi bosh murabbiyi Rudi Garsiya iste’foga chiqishi mumkin. Bu haqda AS xabar berdi.

Manbaga ko‘ra, Ar-Riyod jamoasi rahbariyati tez orada fransiyalik mutaxassisning kelajagi borasida bir qarorga keladi. Jamoa hujumchisi Krishtianu Ronaldu murabbiy ishidan va jamoaning o‘yin uslubidan norozi. 38 yoshli portugaliyalikning fikricha, “Al-Nasr” yanada yuqori saviyada o‘ynab, chempionlikni qo‘lga kirita oladi.

Rudi Garsiya 2022 yilning iyun oyi oxirida klub murabbiyligiga tayinlangan edi. Uning qo‘l ostidagi jamoa Saudiya Arabistoni chempionatining 23 ta turida 53 ochko jamg‘argan va peshqadam “Al-Ittihod”dan 3 ochko ortda qolmoqda.

Ronaldu 2022 yilning dekabrida “Al-Nasr” klubiga o‘tib, 2,5 yillik shartnoma imzolagandi. Hujumchi hozircha jamoa safida 12 ta o‘yin o‘tkazib, 11 ta gol urdi va 2 ta golli uzatmani amalga oshirdi.