Ronaldu axloqsiz xatti-harakati uchun jazolanadigan bo‘ldi
Sport
−
29 fevral
12216“Al-Nasr”ning portugaliyalik hujumchisi Krishtianu Ronaldu o‘tgan hafta o‘yinda qilgan odobsiz xatti-harakati uchun jarimaga tortildi va bir o‘yinga diskvalifikatsiya qilindi. Bu haqda Saudiya Arabistoni futbol federatsiyasi o‘z bayonotida ma’lum qildi.
Joriy yilning 25 fevral kuni “Al-Nasr” safarda “Al-Shabab”ni mag‘lub etdi (3:2). O‘yinda hisobni ochgan Ronaldu final hushtagi chalinganidan so‘ng, kiyim almashtirish xonasiga ketayotganda tribunadagi muxlislarga qarab axloqsiz harakatni amalga oshirdi.
Ronalduning odobsiz imo-ishorasi o‘yin davomida argentinalik hujumchi Lionel Messining ismini baqirib aytgan raqib muxlislariga qaratilgan. 26 fevral kuni Saudiya futbol federatsiyasi Krishtianuning qilgan ishi bo‘yicha tekshiruv boshladi.
Qayd etilishicha, futbolchi federatsiya tartib-intizom qo‘mitasi reglamentini buzgani uchun 1 ta o‘yinga diskvalifikatsiya qilingan. Ronaldu shuningdek, 30 ming Saudiya riyali (7,9 ming dollar), 20 ming (5,3 ming dollar) “Al-Shabab”ga va yana qo‘shimcha 10 ming (2,6 ming dollar) miqdorida jarima to‘lashi kerak.
Ta’kidlash joiz, bunday holat Saudiya Arabistonida portugaliyalik futbolchi bilan birinchi marta sodir bo‘lmayapti. 8 fevral kuni “Al-Hilol” – “Al-Nasr” (2:0) o‘rtoqlik uchrashuvidan so‘ng maydondan chiqayotib Ronaldu muxlislar futbolchiga qarata uloqtirgan “Al-Hilol” sharfini qo‘liga olib, axloqsiz harakatlar qilgan. “Al-Hilol” muxlislari o‘yin davomida “Messi, Messi”, deb baqirgan. Ronaldu bir necha bor tribunaga qarab “Men bu yerda o‘ynayapman, Messi emas” deb javob qaytargan.
LiveBarchasi
07 noyabr 2023
07 noyabr 2023
07 noyabr 2023