Respublikaning uchta hududida psixotrop moddalar savdosiga chek qo‘yildi  

Toshkent shahri, Andijon va Farg‘ona viloyatlarida kuchli ta’sir qiluvchi dori vositalarining muomalaga kiritilishining oldi olindi. Bu haqda O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti xabar berdi.

Ma’lum qilinishicha, Bosh prokuratura huzuridagi Departamentning Toshkent shahar boshqarmasi, Uchtepa va Chilonzor tuman bo‘limlari tomonidan DXX va IIBB xodimlari bilan hamkorlikda o‘tkazilgan tezkor tadbirlarda “A.S.”, “A” MCHJ va “R.-Ph.” xususiy korxonasiga qarashli dorixona sotuvchilari xaridorlarga hech qanday hujjatsiz jami 60 dona “Karbamazepin”, “Gabanerv”, “Tebantin”  nomli kuchli ta’sir qiluvchi dori vositalarini sotgan vaqtlarida ushlanib, ushbu dorixonalardan yana 12 860 dona kuchli ta’sir qiluvchi dori vositalari ashyoviy dalil sifatida olingan. 

Shuningdek, Departamentning Farg‘ona viloyat boshqarmasi Uchko‘prik tuman bo‘limi tomonidan o‘tkazilgan tezkor tadbirlarda “T.Ph.”, “A.S.” MCHJlarga qarashli dorixonalarning sotuvchilari xaridorlarga hech qanday hujjatlarsiz jami 80 dona “Tebantin” nomli kuchli ta’sir qiluvchi dori vositasini sotgan vaqtlarida ashyoviy dalillar bilan ushlangan. 

Departamentning Andijon viloyat boshqarmasi tomonidan IIB xodimlari bilan hamkorlikda o‘tkazilgan tezkor tadbirda “O‘rikzor” MFY hududida harakatlanib kelayotgan Nexia-2 rusumli avtotransport vositasi to‘xtatilib, ko‘zdan kechirilganda, fuqaro B.M.ning yonidan 50 dona “Lirika” nomli kuchli ta’sir qiluvchi dori vositasi ashyoviy dalil sifatida olingan.

Mazkur holatlar yuzasidan Jinoyat kodeksining 251-1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.

Eslatib o‘tamiz, 2023 yilning dekabr oyi o‘rtalarida Qo‘qon, Qorako‘l va Andijonda psixotrop dorilar savdosi bilan shug‘ullanganlar qo‘lga olingan edi.