“Real” libosida o‘zingizni superqahramondek his qilasiz – Bellingem

“Real Madrid” klubining joriy mavsumdagi to‘purari bo‘lib turgan angliyalik futbolchi Jud Bellingem “L’Equipe” nashriga “qirollik klubi” bilan bog‘liq bir necha savollarga javob berdi.

Jumladan, Jud “qaymoqranglilar” safida Modrich, Kroos va Kurtua bilan birinchi uchrashuvdan qanday taassurot olganini aytgan.

“Avval biroz asabiylashdim. Yulduz futbolchilar meni hech qachon hayratda qoldirmagan. Lekin bu yerga kelib, ular qanday yutuqlarga erishganini ko‘rib, ajablanmasdan boshqa iloj yo‘q. “Real” futbolning cho‘qqisi hisoblanadi”, deydi Jud.

Shuningdek, Bellingem birinchi marta oq futbolka kiyib, “Santyago Bernabeu” maydoniga tushib kelgani bog‘liq xotiralarni ham bo‘lishdi.

“Ta’riflab bo‘lmaydi. Orzum amalga oshdi. “Real” libosini kiysangiz, o‘zingizni superqahramondek his qilasiz. Bu sharaf. Uni har hafta kiyish uchun yaxshi darajaga ega bo‘lish kerak”, deydi yarim himoyachi.

Ma’lumot uchun, angliyalik futbolchi joriy mavsum Madrid klubi safida umumiy  13 ta o‘yinda maydonga tushib, xuddi shuncha gol urdi va 2 ta golli uzatmani amalga oshirdi. Uning klub bilan shartnomasi 2029 yilga qadar mo‘ljallangan.