“Real” La Ligadagi mag‘lubiyatsiz seriyasini uzaytirdi

Madridning “Real” klubi Ispaniya chempionatida qatorasiga 12 o‘yindan beri mag‘lub bo‘lmayapti. Madrid klubi to‘qqiz marta g‘alaba qozondi va uch marta durang o‘ynadi.

Ispaniya chempionatining 18-turi doirasidagi o‘yinda “Alaves” o‘z maydonida “Real”ni qabul qildi. Uchrashuv Vitoriya shahridagi “Mendizorroza” stadionida bo‘lib o‘tdi va mehmonlarning 1:0 hisobidagi g‘alabasi bilan yakunlandi.

92-daqiqada Lukas Vaskes “Real”ga g‘alaba keltirgan golga mualliflik qildi. “Real” Nacho Fernandes maydondan chetlatilganidan so‘ng 54-daqiqadan boshlab kamchilik bo‘lib o‘ynadi.

“Real” 45 ochko jamg‘arib, Ispaniya chempionati turnir jadvalida 1-o‘ringa qaytdi. 2-o‘rinda borayotgan “Jirona”da ham shuncha ochko bor. “Alaves” esa o‘z navbatida 16 ochko bilan turnir jadvalida 15-o‘rinda bormoqda.

Ispaniya chempionatining navbatdagi turida “Alaves” “Real Sosedad” bilan, “Real” esa “Malorka” bilan bahs olib boradi. Uchrashuvlar mos ravishda 2 va 3 yanvar kunlari bo‘lib o‘tadi.