“Real” klublar o‘rtasidagi Jahon chempionatida g‘olib bo‘ldi

Marokash mezbonlik qilgan futbol bo‘yicha klublar o‘rtasidagi Jahon chempionati final bahsida Ispaniyaning “Real” klubi Saudiya Arabistonining “s” jamoasi bilan kuch sinashdi. 

Angliyalik Entoni Teylor boshqarib borgan bahsda umumiy 8 ta gol kiritildi.

Madridliklar uchrashuvning 13-daqiqasida Vinisiusning goli evaziga hisobda oldinga chiqib oldi. Oradan 5 daqiqa o‘tib “qaymoqranglilar” o‘z ustunligini mustahkamladi – gol Federiko Valverde tomonidan kiritildi. 26-daqiqada “Al-Hilol” hisobdagi farqni qisqartira oldi – golga Mussa Marega mualliflik qildi.

54-daqiqada Vinisiusning uzatmasidan so‘ng Karim Benzema raqib darvozasini ishg‘ol qildi. Oradan 4 daqiqa o‘tib “Real Madrid” Federiko Valverde tomonidan kiritilgan goldan so‘ng hisobni yirik ko‘rinishga keltirdi. 63-daqiqada Lusiano Vetto hisobdagi farqni ikkitaga qisqartirdi, oradan olti daqiqa o‘tib “Real” a’zosi Vinisius dubl qayd etdi. 79-daqiqada Lusiano Vetto ham dublga erishdi.

Qolgan daqiqalar davomida tablodagi hisob o‘zgarmadi. Madridning “Real” klubi 5:3 hisobida g‘alaba qozonib, klublar o‘rtasidagi Jahon chempionati g‘olibiga aylandi.

Chempionat yakunlariga ko‘ra, “Real” futbolchisi Vinisius Junior turnirning eng yaxshi futbolchisi deb topildi. Feyr-pley mukofitini ham ispan klubi qo‘lga kiritdi.

Ma’lumot uchun, “qirollik klubi” o‘z tarixida 5 marta mazkur sovringa ega chiqdi. “Real” futbol tarixida ushbu sovrinni eng ko‘p yutgan jamoa hisoblanadi.