“Real” Karvaxalga o‘rinbosar qidirishni boshladi

Madridning “Real” klubi Daniel Karvaxal jarohatidan so‘ng faol ravishda yangi himoyachi izlamoqda. Bu haqda “Marca” xabar berdi.

Manbaga ko‘ra, klub asosiy nomzodlardan biriga aylangan 21 yoshli “Leypsig” himoyachisi Kastello Lyukebaning transferi bo‘yicha muzokaralarni boshlab yuborgan. Yana bir nomzod “Ayaks”ning 18 yoshli markaziy himoyachisi Yorrel Xato bo‘lib, u allaqachon Niderlandiya terma jamoasiga chaqiruv olgan.

Yana bir variant - 18 yoshli  Vitor Reys, u “Palmeyras”ning asosiy jamoasi va Braziliya yoshlar jamoasida o‘ynaydi.

Qayd etish joiz, Karvaxal Ispaniya chempionatining 9-turida “Vilyareal” bilan bahsda tizzasidan jiddiy jarohat oldi. U operatsiya qilinadi va mavsumning qolgan qismini o‘tkazib yuboradi. “Real”ga o‘tishi mumkin bo‘lganlar orasida Trent Aleksandr-Arnold ko‘rsatilgan, ammo uning “Liverpul”dagi shartnomasining noaniqligi vaziyatni murakkablashtiradi.

Hozircha Lukas Vaskes bosh murabbiy Karlo Anchelotti uchun asosiy variant bo‘lib qolmoqda. Joriy mavsumda Vaskes 8 uchrashuvda 1 ta gol urdi va 1 ta golli uzatmani amalga oshirdi.