“Real” 15 yillik antirekordini takrorladi

“Real Madrid” 2009 yildan beri birinchi marta barcha musobaqalarda ketma-ket ikkita uy uchrashuvida mag‘lub bo‘lib, uchta va undan ko‘p gol o‘tkazib yubordi. Bu haqda “Opta Sport” statistik portali xabar berdi.

Manbaga ko‘ra, bundan 15 yil avval “Real” “Barselona”ga 2:6 hisobida mag‘lub bo‘lgan, keyin esa “Malorka”ga imkoniyatni boy bergan (1:3).

“Real” Yevropa Chempionlar ligasi umumiy bosqichining 4-turida o‘z maydonida “Milan”ga mag‘lub bo‘ldi (1:3). Bundan avval esa La Liga doirasida “qaymoqranglilar” o‘z uyida “El klasiko”da “Barselona”dan 0:4 hisobidagi mag‘lubiyatni qabul qilib olgandi.

“Real” ayni damda Yevropa Chempionlar ligasi turnir jadvalida 4 ta turdan keyin 6 ochko bilan 17-o‘rinda bormoqda. Shu bilan birga, Ispaniya chempionatida “qirollik klubi” 11 uchrashuvdan so‘ng 24 ochko jamg‘arib, peshqadam “Barselona”dan 9 ochko ortda qolgan holda 2-o‘rinni band etgan.