Rasman: Jo Bayden AQSH Prezidenti bo‘ldi

Ayni vaqtlarda Vashingtonda AQSHning saylangan Prezidenti Jo Bayden va vitse-prezident Kamola Harrisning inauguratsiya marosimi bo‘lib o‘tyapti.

Marosimda dastlab saylangan vitse-prezident Kamola Harris qasamyod qabul qildi va rasman yangi lavozimga kirishdi. U AQSH tarixidagi birinchi ayol vitse-prezident bo‘ldi.

Harrisdan keyin Jozef Bayden AQSH Prezidenti sifatida qasamyod qildi. Bayden rasman AQSHning 46-prezidenti bo‘ldi.

“Men, kichik Jozef Robinett Bayden tantanali ravishda qasamyod qilamanki, Amerika Qo‘shma Shtatlari Prezidenti vazifalarini sidqidildan bajaraman va Amerika Qo‘shma Shtatlari Konstitutsiyasini bor kuchim bilan qo‘llab-quvvatlayman, qo‘riqlayman va himoya qilaman. Xudo menga yordam bersin”, deya qasamyod keltirdi Bayden bir qo‘li bilan Injilni ushlagan holda.

Saylovda mag‘lub bo‘lgan Donald Tramp tarafdorlari tomonidan 6 yanvar kuni Kapitoliyda bo‘lib o‘tgan tartibsizliklar tufayli tadbirni o‘tkazishda jiddiy xavfsizlik choralari ko‘rilgan. Vashingtonga 25 ming harbiy keltirilgan.

Inauguratsiya marosimida Donald Trampning o‘zi ishtirok etmayapti. U marosimdan bir necha soat oldin Vashingtonni tark etdi.

Demokrat, sobiq vitse-prezident, oqsoqol siyosatchi Jo Bayden AQSHning 46-prezidenti bo‘ladi. U 78 yoshida uchinchi urinishda Oq uyning ovalsimon idorasini qabul qilib olyapti va tarixda eng keksa davlat rahbari sifatida qoladi.