Rasman: Prezident alifboni o‘zgartirishga oid qonunni imzoladi

Bugun, 21 oktyabr kuni Prezident Shavkat Mirziyoyev lotin yozuviga asoslangan o‘zbek alifbosini takomillashtirishga qaratilgan qonunni imzoladi. Bu haqda Prezident Administarsiya rahbari Saida Mirziyoyeva o‘zining Telegram-kanalida ma’lum qildi.

Alifbodagi 4 ta harfning yozilishi takomillashtirildi:

• O‘ → Ö
• G‘ → Ğ
• Sh → Ş
• Ch → Ç

Amaldagi hujjatlar, darsliklar va boshqa materiallarni birdaniga almashtirish talab etilmaydi. Ular yaroqlilik muddati tugagach, o‘z kuchini yo‘qotgach yoki navbatdagi yangilanish jarayonida yangi alifboga moslashtirib boriladi. Ya’ni o‘tish jarayoni bosqichma-bosqich va tabiiy kechadi. Qonunda barcha jihatlar inobatga olingan.

Qonun rasman e’lon qilinganidan keyin 6 oy o‘tib kuchga kiradi.

Eslatib o‘tamiz, joriy yilning sentyabr oyida bo‘lib o‘tgan Senatning 19-yalpi majlisida “Lotin yozuviga asoslangan o‘zbek alifbosini joriy etish to‘g‘risida”gi O‘zbekiston Respublikasi Qonuniga o‘zgartirish kiritish haqida”gi qonun senatorlar tomonidan ma’qullangan edi.