Расман: Президент алифбони ўзгартиришга оид қонунни имзолади

Бугун, 21 октябрь куни Президент Шавкат Мирзиёев лотин ёзувига асосланган ўзбек алифбосини такомиллаштиришга қаратилган қонунни имзолади. Бу ҳақда Президент Администарция раҳбари Саида Мирзиёева ўзининг Telegram-каналида маълум қилди.

Алифбодаги 4 та ҳарфнинг ёзилиши такомиллаштирилди:

• O‘ → Ö
• G‘ → Ğ
• Sh → Ş
• Ch → Ç

Амалдаги ҳужжатлар, дарсликлар ва бошқа материалларни бирданига алмаштириш талаб этилмайди. Улар яроқлилик муддати тугагач, ўз кучини йўқотгач ёки навбатдаги янгиланиш жараёнида янги алифбога мослаштириб борилади. Яъни ўтиш жараёни босқичма-босқич ва табиий кечади. Қонунда барча жиҳатлар инобатга олинган.

Қонун расман эълон қилинганидан кейин 6 ой ўтиб кучга киради.

Эслатиб ўтамиз, жорий йилнинг сентябрь ойида бўлиб ўтган Сенатнинг 19-ялпи мажлисида “Лотин ёзувига асосланган ўзбек алифбосини жорий этиш тўғрисида”ги Ўзбекистон Республикаси Қонунига ўзгартириш киритиш ҳақида”ги қонун сенаторлар томонидан маъқулланган эди.