Rasman: Muhammad Saloh Saudiya klubiga o‘tdi

Saudiyalik 29 yoshli yarim himoyachi Muhammad Saloh rasman “Al-Adalah” futbol klubi bilan shartnoma imzoladi. Bu haqda Saudiya klubi ijtimoiy tarmoqdagi sahifalarida ma’lum qildi.

Unga ko‘ra, “Al-Jabalain” jamoasining chap qanot yarim himoyachisi endilikda Saudiya Arabistonining Oliy ligasidan chiqib ketgan “Al-Adalah” sharafini himoya qiladi.

Bu xabar Saudiya Arabistonining mahalliy ijtimoiy tarmoqlarida tasdiqlangach, ko‘plab mashhur futbol va umumiy sport nashrlari hazil tariqasida e’lon qila boshladi.

Hattoki, Angliyaning “Liverpul” futbol klubining norasmiy Vkontakte sahifasida ham mazkur ma’lumot joylandi va “Rasman: Muhammad Saloh “Al-Adalah” o‘yinchisi”, deya izoh qoldirildi.

Gap shundaki, Muhammad Saloh deganda barcha futbol ihlosmandlari misrlik o‘sha dunyoga mashhur jingalak sochli futbolchini eslaydi. 

Uning Saudiyalik adashi Arabiston klublari yulduz futbolchilarni katta pullar evaziga sotib olayotgan bir vaqtda ijtimoiy tarmoqlarda bir zumda “oltin sarlavha”ga aylandi.