Ramos “Sevilya”ni sotib olish bo‘yicha dastlabki kelishuvga erishdi

“Real Madrid”ning sobiq va Ispaniya terma jamoasining afsonaviy himoyachisi Serxio Ramos o‘zining bolalikdagi klubi “Sevilya”ni sotib olish bo‘yicha dastlabki kelishuvga erishdi. Bu haqda “Marca” xabar berdi.  

Manbaga ko‘ra, dastlabki taklif qiymati 450 million yevroga baholanmoqda. Ramos klub direktorlar kengashidagi bir nechta asosiy aksiyadorlar bilan niyat xatini imzolagan. Ushbu hujjat muzokaralar uchun eksklyuziv davrni ochib beradi hamda “Sevilya”ning moliyaviy holatini chuqur o‘rganish va puxta tekshiruv o‘tkazish imkonini yaratadi. Bu esa yakuniy kelishuvni imzolash yo‘lidagi muhim bosqich hisoblanadi.

Tajribali markaziy himoyachi ushbu loyiha doirasida AQSHda joylashgan Five Eleven Capital kompaniyasini boshqaruvchi argentinalik biznesmen Martin Inko bilan hamkorlik qilmoqda. Inko “Sevilya”ning hozirgi professional futbol direktori Antonio Kordon bilan yaqin ishbilarmonlik aloqalariga ega. Moliyaviy tomon esa Gvatemala kelib chiqishiga ega bo‘lgan va aksiyador hamkor sifatida faoliyat yurituvchi Amerikaning IDC Ventures investitsiya fondi tomonidan qo‘llab-quvvatlanmoqda.

Manbalarning ta’kidlashicha, Ramos o‘z taklifining hayotiyligini isbotlab, klubni sotib olish bo‘yicha asosiy da’vogar sifatida ko‘rilmoqda. Boshqa manfaatdor tomonlar esa moliyaviy hujjatlarni batafsil o‘rganib chiqqach taklifdan voz kechgan.

Qayd etilishicha, joriy yilning 15 yanvar kuni Serxio Ramos akasi Rene hamda advokat-iqtisodchi Xulio Senn bilan birgalikda aksiyadorlar va advokat Alberto Peres Solano bilan bir qator uchrashuvlar o‘tkazib, o‘z niyatlarining jiddiyligini yana bir bor namoyish etgan.