Raisiy Mashhadga, Abdullohiyon Reyga dafn qilindi (fotoreportaj)

Vertolyot halokati oqibatida vafot etgan Eron prezidenti Ibrohim Raisiy bugun, 23 may kuni o‘zi tug‘ilib o‘sgan Mashhad shahridagi Imom Rizo maqbarasiga dafn qilindi. Bu haqda IRNA xabar berdi.

Agentlik ma’lumotlariga ko‘ra, motam tutganlar Raisiy tobutini sakkizinchi shia imomi Ali ar-Rido dafn etilgan joydagi qabrga qo‘yishgan.

Ma’badda Raisiy dafn etilganda, motam kiyimida yuz minglab odamlar bor edi: ular yig‘lab, qayg‘u belgisi sifatida ko‘ksiga urishdi. Dafn marosimidan oldin marhum prezidentning tobutini olib ketayotgan mashina ortidan motam tutganlar bordi.

Ayni paytda, Eronning sobiq tashqi ishlar vazirlari Javad Zarif va Ali Akbar Solihiy hamda boshqa yuqori martabali amaldorlar xuddi shu ofatda halok bo‘lgan tashqi ishlar vaziri Husayn Amir Abdullohiyon xotirasiga uning tobuti vidolashish uchun qo‘yilgan Eron Tashqi ishlar vazirligida hurmat bajo keltirdi. U keyinchalik Tehron yaqinidagi Rey shahridagi Abdol Azim ziyoratgohiga dafn etilgan.

Raisiy bilan vidolashuv marosimlari bir necha kun davom etdi va mamlakatning turli hududlarida bo‘lib o‘tdi. Dastlab voqealar prezident vertolyoti halokatga uchragan joy yaqinida joylashgan Tabrizda, keyin Qum va Tehronda sodir bo‘ldi.

Eslatib o‘tamiz, kecha, 22 may kuni Eron poytaxtida o‘tkazilgan motam tadbirlarida 60 ga yaqin xorijiy delegatsiyalar, jumladan 10 nafari davlat rahbarlari darajasida, 20 nafari vazirlar darajasida ishtirok etgan edi. O‘zbekiston delegatsiyasiga Oliy Majlis Qonunchilik palatasi Spikeri Nurdinjon Ismoilov va Tashqi ishlar vaziri Baxtiyor Saidov boshchilik qildi.