Putinga qarshi qadam: Moldova MDHdan chiqishni boshladi

Moldova MDH bilan tashkilot tarkibidan chiqishga imkon beradigan asosiy kelishuvlarni denonsatsiya qilish tartibini boshladi. Bu haqda Bosh vazir o‘rinbosari, respublika tashqi ishlar vaziri Mixay Popshoy “Radio Moldova” efirida ma’lum qildi. 

“Moldova Mustaqil Davlatlar Hamdo‘stligiga a’zoligi uchun asos bo‘lgan uchta asosiy kelishuv– MDH Nizomi, MDHni tuzish to‘g‘risidagi bitim va tegishli ilovani denonsatsiya qilish tartibini boshladi. Ular rasman bekor qilingandan so‘ng mamlakatimiz MDHga a’zo bo‘lishni qonuniy ravishda to‘xtatadi, garchi de-fakto tashkilotdagi ishtiroki bundan oldinroq to‘xtatilgan bo‘lsa ham,  bu hujjatlar yakuniy tasdiqlash uchun parlamentga yuboriladi”, deydi Bosh vazir o‘rinbosari. 

Uning so‘zlariga ko‘ra, joriy yilning fevral oyining o‘rtalariga qadar hukumatda denonsatsiya jarayonlari yakunlanadi. Shundan so‘ng parlament qaror qabul qiladi, u Prezident tasdig‘iga kiritiladi. 

Moldovaning MDHga munosabati 2020 yilda bo‘lib o‘tgan prezidentlik saylovlarida Mayya Sanduning g‘alabasidan so‘ng o‘zgara boshladi, u Yevropa Ittifoqiga qo‘shilish yo‘lini e’lon qildi va Hamdo‘stlik sammitlarida ishtirok etishdan bosh tortdi. 2023 yil fevral oyida respublika hukumati MDH doirasida tuzilgan 282 ta bitimdan 120 dan ortig‘ini denonsatsiya qilish rejalarini e’lon qildi. Shu bilan birga, Popshoyning aniqlik kiritishicha, Kishinyov Hamdo‘stlik doirasidagi mamlakat uchun muhim va foydali kelishuvlarni bekor qilish niyatida emas. 

Moldova Respublikasining sobiq prezidenti, muxolifatdagi Sotsialistlar partiyasi rahbari Igor Dodon parlamentdagi ko‘pchilikning bu qarorlarini tanqid qilib, Sandu olib borayotgan Rossiya va MDH davlatlaridan ajralish yo‘li Moldova xalqi manfaatlariga zid ekanligini ma’lum qildi. Rossiya Federatsiyasi Tashqi ishlar vazirligi rasmiy vakili Mariya Zaxarova Kishinyovning siyosatini ikki tomonlama deb atab, Moldova rasmiylari Hamdo‘stlikda ishtirok etishning ijtimoiy-iqtisodiy afzalliklaridan voz kechishga shoshilmayotganini, shu bilan birga, tashkilotdan chiqishga intilayotganini bildirdi.