Putin O‘zbekistonga kelyapti

Rossiya Federatsiyasi Prezidenti Vladimir Putin O‘zbekistonga kelyapti. Bu haqda QALAMPIR.UZ manbasi xabar berdi. 

Rossiya rahbarining O‘zbekistonga tashrifi joriy yilning 26 mayiga rejalashtirilgani aytilmoqda. Poytaxt Toshkent bo‘ylab olib borilayotgan obodonlashtirish ishlari ham shundan darak bermoqda. Tashrif bahonasi ma’lum emas. Hozircha Rasmiy Moskva va Toshkent Putinning tashrifi haqida ma’lumot bergani yo‘q.

QALAMPIR.UZ tashrif amalga oshirilishi haqidagi xabarni tasdiqlatish maqsadida O‘zbekiston Tashqi ishlar vazirligi bilan bog‘landi. Vazirlik mas’ullari buni aniqlashtirib, so‘ng aloqaga chiqishlarini ma’lum qildi. 

Eslatib o‘tamiz, bugun, 21 may kuni O‘zbekiston Respublikasi Prezidenti Shavkat Mirziyoyev Rossiya Federatsiyasi Prezidenti Vladimir Putin bilan telefon orqali muloqot qildi. Telefon suhbati haqida ikki davlat rahbarlari matbuot xizmati tarqatgan xabarlarda ham tashrif borasida so‘z bormagan. 

Shavkat Mirziyoyev so‘nggi bor joriy yilning 8-9 may kunlari amaliy tashrif bilan Rossiyada bo‘lgan edi. So‘nggi rasmiy tashrifni esa 2023 yilning 5-7 oktyabr kunlari amalga oshirgan. O‘shanda Qozog‘iston Prezidenti Qosim-Jomart To‘qayev va Rossiya Prezidenti Vladimir Putin bilan birgalikda Rossiyadan Qozog‘iston hududi orqali O‘zbekistonga tabiiy gaz yetkazib berilishiga start berilgan.

Vladimir Putin esa oxirgi marta O‘zbekistonga 2022 yilning 15 sentyabr kuni kelgan edi. O‘shanda ushbu tashrif ham amaliy (SHHT sammiti doirasida), ham rasmiy ko‘rinish kasb etgandi. Prezidentlar O‘zbekiston bilan Rossiya o‘rtasida keng qamrovli strategik sheriklik to‘g‘risidagi deklaratsiyani imzolagan. 

Ma’lumot uchun, 15-17 mart kunlari bo‘lib o‘tgan Rossiya Prezidenti saylovida ishtirok etgan Putin 87,28 foiz ovoz olib, g‘alaba qildi va yana olti yil – 2030 yilgacha taxtni egalladi. Inauguratsiya marosimidan keyin ilk tashrifni Xitoy Xalq Respublikasiga amalga oshirgan Putin, ikkinchi manzil o‘laroq O‘zbekistonni tanladi.