Putin Shols va Makronga shart qo‘ydi

Rossiya Prezidenti Vladimir Putin, Fransiya Prezidenti Emmanuel Makron va Germaniya kansleri Olaf Shols mart oyi o‘rtalaridan beri ilk bor uch tomonlama telefon orqali muloqot qildi. Germaniya rasmiylariga ko‘ra, muloqot Berlin va Parij tashabbusi bilan bo‘lib o‘tgan va taxminan 80 daqiqa davom etgan. Muloqotda Putin G‘arb sanksiyalarini bekor qilish sharti bilan dunyoda kechayotgan don taqchilligini hal qilishga va’da bergan.

Kremlga ko‘ra, suhbatning asosiy mavzulari Ukrainadagi vaziyat va global oziq-ovqat xavfsizligini ta’minlash bo‘lgan.

Putin Kiyev bilan muloqotni qayta tiklashga ochiqligini va sanksiyalar bekor qilingan holda qishloq xo‘jaligi mahsulotlari va o‘g‘itlar eksportini oshirishga tayyorligini ta’kidlagan.

Rossiya Prezidenti davom etayotgan maxsus harbiy operatsiya kontekstidagi so‘nggi o‘zgarishlar haqida batafsil ma’lumot berib,  Rossiya Qurolli Kuchlari xalqaro gumanitar huquq normalariga qat’iy rioya etishini ta’kidlab, Mariupol va Donbassning ozod qilingan boshqa shaharlarida tinch hayot o‘rnatish bo‘yicha tizimli ishlar qanday tashkil etilgani haqida ma’lumot berdi. 

Qayd etilishicha, Kiyev aybi bilan muzlatib qo‘yilgan muzokaralar yo‘lidagi vaziyatga alohida e’tibor qaratilmoqda. Vladimir Putin Rossiya tomonining muloqotni tiklashga ochiqligini tasdiqlagan. 

Rossiya Prezidenti, shuningdek, Ukrainani G‘arb qurollari bilan davom ettirishning xavfli tabiati masalasini keskinlashtirdi va bu borada vaziyatni yanada beqarorlashtirish va gumanitar inqirozni kuchaytirish xavfi haqida ogohlantirdi. 

“Jahon oziq-ovqat xavfsizligini ta’minlash sohasidagi vaziyat atroflicha ko‘rib chiqildi. Vladimir Putin G‘arb davlatlarining noto‘g‘ri iqtisodiy va moliyaviy siyosati, shuningdek, Rossiyaga qarshi qo‘llagan sanksiyalari natijasida yuzaga kelgan oziq-ovqat ta’minotidagi qiyinchiliklarning asl sabablarini asosli va aniq ma’lumotlar asosida tushuntirib berdi. O‘z navbatida, Rossiya donni to‘siqsiz eksport qilish, jumladan, Qora dengiz portlaridan Ukraina donini eksport qilish imkoniyatlarini topishga yordam berishga tayyor. Rossiya o‘g‘itlari va qishloq xo‘jaligi mahsulotlarini yetkazib berish hajmining oshishi ham jahon oziq-ovqat bozoridagi keskinlikni kamaytirishga yordam beradi, bu, albatta, tegishli sanksiyalar cheklovlarini olib tashlashni talab qiladi”, deyiladi Kreml tarqatgan rasmiy xabarda. 

Rossiya yetakchisi Matbuot kotibi Dmitriy Peskovning aytishicha, Putin, Makron va Shols telefon orqali aloqalarni davom ettirishga kelishib olgan. 

Ma’lumot uchun, Rossiya, Fransiya va Germaniya rahbarlari o‘rtasidagi uch tomonlama muloqot so‘nggi bor joriy yilning 12 mart kuni bo‘lib o‘tgan edi. Unda asosiy mayzular Ukrainadagi gumanitar vaziyat va Moskva va Kiyev o‘rtasidagi muzokaralar bo‘lgan.