Putin Ramzan Qodirovning 24 yoshli qizini orden bilan taqdirladi

Rossiya Prezidenti Vladimir Putin Checheniston rahbari Ramzan Qodirovning qizi Oyshat Qodirovani II darajali “Vatan oldidagi xizmatlari uchun” ordeni bilan taqdirladi. Tegishli farmon huquqiy axborotning rasmiy internet portalida e’lon qilindi.

Hujjatga ko‘ra, 24 yoshli Qodirova milliy madaniyat va san’atni rivojlantirishdagi xizmatlari, ko‘p yillik samarali ijodiy faoliyati uchun taqdirlangan.

Oyshat Qodirova 2021 yil oktyabridan buyon Checheniston Madaniyat vaziri lavozimida ishlab kelayotgan edi. Bungacha u bir yil Checheniston Madaniyat vazirligi rahbarining birinchi o‘rinbosari bo‘lib ishlagan.

Davlat xizmatidan oldin respublika rahbarining qizi Firdavs islom modalar uyini uch yil boshqargan.

Shu vaqt ichida u "Checheniston Respublikasi oldidagi xizmatlari uchun", "Inson huquqlarini himoya qilgani uchun" medallari, Chechenistonda xizmat ko‘rsatgan madaniyat xodimi unvoni va Qodirov ordeni – respublikaning oliy mukofotini olgan.

Ramzan Qodirov va uning oilasi muntazam ravishda mukofotlanadi. Masalan, 2023 yil iyun oyida Checheniston rahbarining 20 yoshli qizi Xutmat Qodirova respublikada “Tibbiyot rivojiga qo‘shgan ulkan hissasi” uchun Qodirov ordeni bilan taqdirlangan edi.

Xutmat Qodirova mukofotdan bir necha oy oldin Checheniston sog‘liqni saqlash sohasi kuratori lavozimiga tayinlangan edi.

Bundan tashqari, Rossiya Prezidenti Vladimir Putin Ramzan Qodirovning onasini “Shon-sharaf” ordeni bilan taqdirlagandi.