Putin men uchun hech kim – Zelenskiy 

Ukraina Prezidenti Vladimir Zelenskiy bugun, 26 yanvar kuni Britaniyaning “Sky News” telekanaliga bergan intervyusida Rossiya yetakchisi Vladimir Putin bilan muzokaralar o‘tkazishdan manfaatdor emasligini aytdi.

“Bu muzokaralar men uchun qiziq emas. U bilan uchrashish, gaplashishni umuman foydasi yo‘q. Men Rossiyada kim qaror qabul qilishini haqiqatan ham tushunmayapman”, dedi Zelenskiy.

Shuningdek, Zelenskiy uning uchun birinchi raqamli vazifa odamlar hayotini asrab qolish ekanligini aytgan. Unga ko‘ra, Ukraina Rossiya hududida jang qilishni xohlamaydi. Ukraina urushni imkon qadar tezroq to‘xtatib, rus qo‘shinlarini tezroq mamlakatdan quvib chiqarishni istaydi.

“Sizga aniq ayta olamanki, agar ular bizning hududimizni tark etishsa, urush to‘xtaydi. Hammasi shu”, dedi Zelenskiy.

“Muzokaralar uchun juda kechmi?”, deb so‘ralganda esa Zelenskiy to‘liq miqyosli bosqindan keyin u uchun Putin “hech kim” ekanini aytgan.

“Biz urushdan oldin u bilan ko‘rishganmiz. Ko‘rdimki, u bir narsa aytib, boshqa narsani qiladigan odam. To‘liq miqyosli bosqindan keyin, u men uchun hech kim”, degan Zelenskiy.

Zelenskiy oldin ham Rossiya bilan muzokara qilishni maxsus farmon bilan taqiqlagan edi. Rossiya Prezidentining matbuot kotibi Dmitriy Peskov ham Moskva va Kiyev o‘rtasida muzokaralar olib borishning imkoni yo‘qligini, chunki muzokara uchun na de-fakto, na de-yure shart-sharoiti borligini ma’lum qilgan.

Alibek Beyjanov