Putin 2036 yilgacha Rossiyaning milliy siyosati qanday bo‘lishini belgiladi

Rossiya Prezidenti Vladimir Putin 2036 yilgacha bo‘lgan davrda Rossiya Federatsiyasining davlat milliy siyosati strategiyasini tasdiqladi. Hujjat 2026 yil 1 yanvardan kuchga kiradi.

Strategiya 6 ta bo‘lim, 61 ta banddan iborat. Umumiy qoidalardan tashqari, hujjatda Rossiyadagi millatlararo va elatlararo munosabatlarning hozirgi holati haqida umumiy ma’lumot berilgan. Strategiyaning boshqa boblari davlat milliy siyosatining maqsadlari, tamoyillari va ustuvor yo‘nalishlariga, shuningdek, Rossiya Federatsiyasi mintaqalarida milliy siyosatni amalga oshirish, strategiyaning bosqichlari va maqsadli ko‘rsatkichlariga bag‘ishlangan. 

Xususan, hujjatda ta’kidlanganidek, strategiyani amalga oshirish Rossiya Federatsiyasining tarixan shakllangan davlat birligi va hududiy yaxlitligini saqlashga, uning ichki barqarorligiga, Rossiya Federatsiyasi xalqlarining uyg‘un rivojlanishi va farovonligiga, o‘ziga xos sivilizatsiya davlati asosi sifatida Rossiya Federatsiyasining ko‘p millatli xalqi birligini mustahkamlashga hissa qo‘shishi kerak.

Rossiya Federatsiyasining oldingi Milliy davlat siyosati strategiyasi 2012 yilda 2025 yilgacha bo‘lgan davr uchun qabul qilingan. Unga ikki marta – 2018 va 2024 yillarda o‘zgartirishlar kiritilgan. Yangi strategiya (37 banddan iborat) maqsadli ko‘rsatkichlar va kutilayotgan natijalar bo‘yicha avvalgisiga qaraganda kengroq. Ular orasida umumrossiya fuqarolik o‘zligini anglash darajasi – 2036 yilga kelib kamida 95%, tarix, madaniyat va qadriyatlar mushtarakligini tan olish asosida shakllangan fuqarolik o‘zini o‘zi anglash va birdamlikning yuqori darajasi, milliy (etnik) va diniy asosdagi mojarolar sonining kamayishi kabilar bor. 

Yangi strategiyadan farqli o‘laroq, avvalgi Strategiyada “sivilizatsiya davlati” atamasi mavjud emas edi, ammo ilgari bu ta’rif Putin tomonidan 2024 yilda tasdiqlangan Rossiya Federatsiyasining tarixiy ta’lim sohasidagi davlat siyosati asoslarida ham tilga olingan. 

Putin hukumatga hujjatni amalga oshirish rejasini tasdiqlash vazifasini topshirdi va mintaqalar hokimiyati hamda mahalliy o‘zini o‘zi boshqarish organlariga qoidalarga amal qilishni tavsiya qildi.