Prezident va hukumat hujjatlari bilan tuzilgan 29 ta kollegial organ tugatiladi

O‘zbekiston Respublikasi Prezidenti tomonidan “Byurokratik to‘siqlarni yanada qisqartirish hamda davlat organlari va tashkilotlari faoliyatiga zamonaviy boshqaruv tamoyillarini joriy qilish chora-tadbirlari to‘g‘risida”gi qaroriga ko‘ra, 2020 yil 1 yanvardan boshlab tugatilayotgan alohida idoralararo kollegial organlar ro‘yxati tasdiqlandi. Ro‘yxatga 29 ta tashkilot kiritilgan.

Adliya vazirligi manfaatdor vazirlik va idoralar bilan birga 2020 yil 1 martga qadar mazkur qarorning 3-ilovasini amalga oshirishga qaratilgan tegishli tadbirlarni amalga oshirilishini ta’minlashi va bunda quyidagilarni nazarda tutishi belgilandi:

- tugatilayotgan idoralararo kollegial organlarning vazifalari, funksiyalari, huquq va majburiyatlari belgilab berilgan normativ-huquqiy hujjatlarni xatlovdan o‘tkazish va o‘rganish;

- o‘tkazilgan xatlov va o‘rganish natijalariga ko‘ra, aniqlangan tugatilayotgan idoralararo kollegial organlarning dolzarb vakolatlarini tegishli davlat organlari va tashkilotlariga o‘tkazishni nazarda tutuvchi normativ-huquqiy hujjatlar loyihalarini ishlab chiqish.